وه‌زیرێ ناڤخوه: هیڤیدارین كێشه‌یێن ئه‌ردێ كریستیانان ل دووڤ یاسایێ و ب دادپه‌روه‌ری بهێنه چاره‌كرن
ئه‌ڤرۆ:
رێبه‌ر ئه‌حمه‌د، وه‌زیرێ نافخۆ و ئانۆ جه‌وهه‌ر، وه‌زیرێ ڤه‌گۆهاستنێ یێن حكومه‌تا هه‌رێما كوردستانێ و د. عه‌بدولحه‌كیم خسرۆ، سه‌رۆكێ فه‌رمانگه‌ها دووڤچوون و هه‌ماهه‌نگیێ، ل رۆژا 17/11/2021 سه‌ره‌دانا كۆچكا پارێزگه‌ها دهۆكێ دا و ژلایێ د. عه‌لی ته‌ته‌ر، پارێزگارێ دهۆكێ و ب به‌رهه‌ڤبوونا گوهدار شێخۆ، سه‌رپه‌رشتێ ئیدارا سه‌ربخوه یا زاخۆ پێشوازی لێهاته كرن.
د كۆمبوونه‌كێ دا دگه‌ل دام و ده‌زگه‌هێن په‌یوه‌ندیدار یێن كارگێریا پارێزگه‌ها دهۆكێ و ئیدارا سه‌ربخوه یا زاخۆ گه‌نگه‌شه ل دۆر كێشێن ئه‌رد و زه‌ڤیێن كرستیانان پشتی ساله‌كێ ژ ده‌ركه‌فتنا بڕیارا هه‌ژماره 83 یا حكومه‌تا كوردستانێ كر.
وه‌زیرێ ناڤخوه د په‌یڤه‌كێ دا ئاماژه ب به‌رنامێ حكومه‌تا هه‌رێما كوردستانێ بۆ پاراستنا ئه‌ردێ پێكهاته‌یان و خووشك و برایێن كرستیان كر و دۆپاتی ل بجهئینانا قانوونا نه‌هێلانا ئه‌نجامدانا زێده‌گاڤیان ل سه‌ر ڤان ئه‌ردان و بڕیارێن لژنا بلندا حكومه‌تا هه‌رێما كوردستانێ كر، دا دیاركرن كو حكومه‌تا هه‌رێما كوردستانێ خوه به‌رامبه‌ر پاراستنا مافێن وه‌لاتیێن هه‌رێما كوردستانێ ژ هه‌موو پێكهاته‌یان به‌رپرسیار دبینیت و گۆت: “هیڤیدارین كێشه‌یێن مایی ل دووڤ قانوونێ و ب دادپه‌روه‌ری بهێنه چاره‌كرن و ده‌ستخۆشی ژی ل یه‌كه‌یێن كارگێری كر كو سكالایێن وه‌لاتیێن كرستیان وه‌رگرتینه و بزاڤێن چاره‌سه‌ریێ قووناغه‌كا باش ده‌ربازكرینه و لایه‌نێن په‌یوه‌ندیدار راسپاردن ل چاره‌سه‌ریێن بنه‌ره‌تی بۆ ڤان بابه‌تان بگه‌ڕن و ب وه‌كهه‌ڤی د به‌رده‌وام بن”.
پاشی وه‌زیرێ ڤه‌گۆهاستنێ یێ حكومه‌تا هه‌رێما كوردستانێ به‌حس ل وان سكالا و گازنده و كێشێن ئه‌ردێن كرستیانان كر و هه‌ژماره‌كا كه‌یسێن پێدڤی چاره‌سه‌ریێ د كۆمبوونێ دا به‌حسكرن.
دیسا هه‌ر ئێك ژ پارێزگارێ دهۆكێ و سه‌رپه‌رشتێ ئیدارا سه‌ربخوه یا زاخۆ ئه‌و پێنگاڤێن كریاری بۆ چاره‌كرنا ڤان كه‌یسان و كه‌یسێن پێدڤی ئێكلاكرن و چاره‌كرنێ به‌حسكرن، د دووڤ دا ده‌ڤه‌ردارێن پارێزگه‌ها دهۆكێ پشتی وه‌رگرتنا سكالایان بۆ ده‌مێ سێ هه‌یڤان ده‌رئه‌نجامێن سكالایان و چاره‌كرنا وان بۆ كۆمبوونێ به‌رچاڤكرن.
دیسا ل رۆژا 18/11/2021 د. عه‌لی ته‌ته‌ر، پارێزگارێ دهۆكێ دگه‌ل هه‌ژماره‌كا كه‌سایه‌تیێن گوندێن سێجێ و قه‌شه‌فرێ یێن كرستیانان ب به‌رهه‌ڤبوونا ده‌ڤه‌ردارێ سێمێلێ كۆمبوو، د كۆمبوونێ دا ب هووری گوهداریا داخوازی و گازندێن هه‌ردو گوندان كر و پارێزگارێ دهۆكێ د په‌یڤه‌كێ دا راگه‌هاند: به‌رنامێ حكومه‌تا هه‌رێما كوردستانێ ئه‌وه پرۆژێن خزمه‌تگوزاری بگه‌هینیته هه‌موو ده‌ڤه‌ران.
دیسا هه‌ر ل هه‌مان رۆژ د. عه‌لی ته‌ته‌ر، پارێزگارێ دهۆكێ پێشوازی ل خانم به‌یان سامی عه‌بدولره‌حمان، نوونه‌را حكومه‌تا هه‌رێما كوردستانێ ل ویلایه‌تێن ئێكگرتی یێن ئه‌مریكا كر، د روونشتنه‌كێ دا ل دۆر په‌یوه‌ندیێن د ناڤبه‌را حكومه‌تا هه‌رێما كوردستانێ و وه‌لاتێ ناڤبری و ره‌وشا په‌نابه‌ران و بهێزكرنا په‌یوه‌ندیێن پارێزگه‌ها دهۆكێ دگه‌ل باژێرێن ویلایه‌تێن ئه‌مریكا دانوستاندن هاته‌كرن.
