پڕۆژێ یه‌كه‌یێن ئاكنجیبوونێ بۆ مامۆستایێن دهۆكێ دێ هێته بجهئینان
ئه‌ڤرۆ:
پشتی چه‌ندین سالان ئاریشا دروستكرنا باژێرێ مامۆستایان ل دهۆكێ هاته چاره‌سه‌ركرن و به‌رپرسه‌كێ ئێكه‌تیا مامۆستایان ژی دبێژیت: ئه‌رد بۆ پرۆژه‌ی دێ هێته دابینكرن و ل دووڤ خالان مامۆستایێن پارێزگه‌ها دهۆكێ ژ وی پرۆژه‌ی دێ مفادار بن.
عه‌تا ئه‌حمه‌د، جێگرێ سه‌رۆكێ ئێكه‌تیا مامۆستایێن كوردستانێ گۆت: “پڕۆژێ باژێرێ مامۆستایان ل هه‌ولێر، سلێمانی و كه‌لار هاتینه دروستكرن و هه‌ژماره‌كا زۆرا مامۆستایان ژی ژ وان یه‌كه‌یێن ئاكنجیبوونێ مفادار بووینه، به‌لێ دروستكرنا پرۆژێ باژێرێ مامۆستایان ل پارێزگه‌ها دهۆكێ، ژ ئه‌گه‌رێ هه‌بوونا ئاریشا، هه‌تا نوكه نه‌كه‌فتیه د بیاڤێ بجهئینانێ دا و ئیدارا پارێزگه‌ها دهۆكێ، ژ ئه‌گه‌رێ هه‌بوونا تێبینیێن وان ل سه‌ر كۆمپانیا بجهئینه‌ر، پرۆژه نه‌ئێخستیه د بیاڤێ بجهئینانێ دا”.
وی به‌رپرسێ ئێكه‌تیا مامۆستایان زێده‌تر بۆ مالپه‌ڕێ فه‌رمیێ پارتی دیموكراتی كوردستان گۆت: “د كۆمبوونا حه‌فتیا بۆری یا مه‌كته‌با سكرتاریه‌تا ئێكه‌تیا مامۆستایان دا دوپاتی ل سه‌ر بجهئینانا پڕۆژێ باژێرێ مامۆستایان ل پارێزگه‌ها دهۆكێ هاتیه كرن و بڕیاره ئه‌و ژی بهێته بجهئینان”.
عه‌تا ئه‌حمه‌د ئاماژه ب وێ چه‌ندێ ژی كر كو ده‌سته‌یا وه‌به‌رهێنانێ و لایه‌نێن په‌یوه‌ندیدار سۆز دایه كو ئه‌ردی بۆ پڕۆژێ باژێرێ مامۆستایان ل پارێزگه‌ها دهۆكێ دهۆكێ ته‌رخان بكه‌ن و گۆت: “پشتی ئه‌رد بۆ پرۆژه‌ی دهێته دابینكرن، ده‌ست ب ڕێكارێن دروستكرنا باژێرێ مامۆستایێن دهۆكێ ژی دێ هێته كرن، به‌لێ هه‌تا نوكه ئه‌م نزانین چه‌ند یه‌كه‌یێن ئاكنجیبوونێ بۆ مامۆستایێن پارێزگه‌ها دهۆكێ دێ هێنه دروستكرن، چونكو ل دووڤ رووبه‌رێ ئه‌ردی یه‌كه‌یێن ئاكنجیبوونێ دێ هێنه دروستكرن و ل دووڤ خالان ل سه‌ر مامۆستایێن پارێزگه‌ها دهۆكێ دێ هێنه به‌لاڤكرن”.
