جێگرێ پارێزگارێ دهۆكێ: ل پارێزگه‌ها دهۆكێ پتر ژ 350 پرۆژیێن خزمه‌تگوزاری دهێنه بجهئینان
ئه‌ڤرۆ، دووڤچوون:
جێگرێ پارێزگارێ دهۆكێ بۆ كارۆبارێن ته‌كنیكی راگه‌هاند، ب كوژمێ 700 ملیار دیناران پرۆژه‌یێن خزمه‌تگوزاری ل دهۆكێ هاتینه بجهئینان و خه‌لكێ بیانی ب پێشكه‌ڤتنا ل دهۆكێ چێبووی دلخۆش دبن و گۆت: نوكه ژی ده‌لیڤه بۆ وه‌به‌رهێنه‌ران هاتیه دابینكرن بۆ هندێ پتر خزمه‌تكرنا خه‌لكێ دهۆكێ بكه‌ن”.
ماجد سه‌ید سالح جێگرێ پارێزگارێ دهۆكێ بۆ كارۆبارێن ته‌كنیكی بۆ ئه‌ڤرۆ دیار كر “ل سه‌رانسه‌رێ پارێزگه‌ها دهۆكێ پتر ژ 350 پرۆژه یێن خزمه‌تگوزاری ب كوژمێ 700 ملیار دیناران هاتینه بجه ئینان. دبیت پرۆژه‌یێن ستراتیجی كێم دناڤدا بن، لێ پرۆژه‌یێن هاتینه ده‌ست نیشانكرن ژلایێ ئیدارا دهۆكێ ڤه هه‌موو ئه‌و پرۆژه‌نه یێن ب ژیانا وه‌لاتیان ڤه گرێدایی. ئه‌ڤه ژی پێنگاڤه‌كا زۆر باشه یا خزمه‌تكرنا وه‌لاتیان.
زێده‌تر گۆت: پتر جاده‌یێن ناڤ تاخێن ئاكنجیبوونێ دا هه‌تا چێكرنا جاده‌یێن سه‌ره‌كی یێن گوند وباژێران هاتینه چێكرن. د ڤێ كابینا حكومه‌تا هه‌رێما كوردستانێ دا زۆر خزمه‌ت بۆ وه‌لاتیان د وارێ خزمه‌تگوزاری هاتینه ئه‌نجامدان بۆ دابه‌شكرنا پرۆژان ژی دادپه‌روه‌ری هاتیه ئه‌نجامدان بۆ هه‌موو گوند و ده‌ڤه‌ران پرۆژه هاتینه دابینكرن.
جێگرێ پارێزگاری دیار كر، ئه‌و پرۆژه‌یێن نیڤه‌رۆ ژی كابینا نه‌هێ یا حكومه‌تا هه‌رێما كوردستانێ دا هاتنه ته‌مامكرن ب دووماهی هاتینه وه‌كو رێیا سه‌ره‌كی یا روڤیا -گۆپال و چه‌ندین پرۆژه‌یێن دی ژی هه‌بووینه وه‌كو چێكرنا پرژۆه‌یێ ئوڤه‌ر پاسێ ناڤ دهۆكێ دا. ڤان پرۆژه قه‌ره‌بالغ هاتن و چوونێ زۆر كێم كریه و رێك خۆشبووینه. نوكه ژی پرۆژه‌كێ مه‌زن یێ دهێته چێكرن ل كانی سپی ل پارێزگه‌ها دهۆكێ، ئه‌ڤ پرۆژه دێ ژێرخانه‌یا ئابۆری ل دهۆكێ نه‌خاسمه ژی وارێ چاندنێ دا گه‌له‌ك بهێز كه‌ت و دێ هژماره‌كا زۆر یا ده‌لیڤێن كاركرنێ بۆ وه‌لاتیان په‌یدابن. هه‌روه‌سا ژی پشته‌ڤانیه بۆ جۆتیاران بۆ پتر به‌رهه‌مێن چاندنێ بچینن، چونكو دێ به‌رهه‌مێ وان ل دهۆكێ هێته وه‌رگرتن”.
ل دۆر وێ یه‌كێ ژی كو خه‌لكێ بیانی ده‌مێ قه‌ستا دهۆكێ دكه‌ن ب چ دلخۆش دبن، جێگرێ پارێزگاری گۆت: خه‌لكێ بیانی قه‌ستا دهۆكێ دكه‌ن هه‌ست ب گوهۆرینێن مه‌زن دكه‌ن گه‌له‌ك پێشكه‌ڤتنا ل دهۆكێ چێبووی دلخۆش دبن نه‌خاسمه ژی چه‌ندین پرۆژه‌یێن گه‌شتوگوزاری هاتینه بجهئینان، وه‌كو تلفریكا چیایێ زاوا و پرۆژه‌یێ زاویته، هه‌روه‌سا ژی كه‌رتێ وه‌ربه‌هێنانێ دا چه‌ندین پرۆژه هه‌نه نوكه ژی حه‌فت تاوه‌رێن مه‌زن دێ ل دهۆك هێنه دروستكرن ئه‌ڤه دێ سیمایه‌كێ جوانتر ده‌نه دهۆكێ ده‌مێ گه‌شتیار قه‌ستا دهۆكێ كه‌ن زۆر دلخۆش بن ڤێ ته‌ناهی و ئاڤه‌دانی و پێشكه‌ڤتنا ل دهۆكێ هه‌ی”.
ماجد سه‌ید سالح ئه‌و یه‌ك ژی دیار كر “ده‌لیڤه ب پرۆژه‌یێن وه‌به‌رهێنانێ ل دهۆكێ هاتیه دان و ئه‌ڤه دێ پتر خزمه‌تا ده‌ڤه‌رێن دهۆكێ كه‌ت د وارێ وه‌به‌رهێنانێ دا. ئه‌ڤ پرۆژه یێ پیشنیازكریه پێك دهێت ژ 378 پرۆژه‌یێن وه‌به‌رهێنانێ ئه‌ڤ پرۆژه ژلایێ ئیدارا پارێزگه‌ها دهۆكێ ڤه هاتیه په‌سه‌ندكرن و هه‌موو لایه‌نێن به‌رهه‌ڤكرنا ده‌لیڤێن وه‌به‌رهێنانێ دا بۆ دهۆكێ به‌شداربووینه كو رێڤه‌به‌ریا گشتی یا وه‌ربه‌رهێنانێ ل دهۆكێ رووپیڤانه‌ك ئه‌نجامدایه ل سه‌ر ئاستێ هه‌موو دام و ده‌زگه‌هیێن پارێزگه‌ها دهۆكێ د ئه‌نجامدا ئه‌ڤ ده‌لیله هاتیه به‌رهه‌ڤكرن و دێ پتر ئاسانكاری بۆ وه‌به‌رهێنه‌ران هێنه كرن دا كو ئه‌ڤ پرۆژه بكه‌ڤنه د وارێ بجه ئینانێ دا. ئارمانج ژ ده‌لیلێ ئه‌وه وه‌به‌رهینه‌رێن بیانی پتر قه‌ستا دهۆكێ بكه‌ن”.
سه‌باره‌ت وێ چه‌ندێ پرۆژه‌یێ فرۆكخانه‌یا دهۆكێ گه‌هشته كیڤه، جێگرێ پارێزگارێ دهۆكێ گۆت:”ده‌مێ سه‌رۆكێ حكومه‌تا هه‌رێما كوردستانێ بۆ راگه‌هاندنا ئیدارا سه‌ربه‌خۆیا زاخۆ قه‌ستا دهۆكێ كری د چارچۆڤێ وێ سه‌ره‌دانێ دا سه‌ره‌دانا فرۆكخانه‌یا دهۆكێ ژی هاتبوو كرن، ل به‌ره پێداچوون د چه‌وانیا جێ ب جێكرن گه‌له‌ك كار بهێنه كرن وه‌كو دیزاین وكارێن پێدڤی و ئه‌ز باوه‌رم سه‌رۆكێ حكومه‌تی ل سه‌ر داخوازیا ئیدارا پارێزگه‌ها دهۆكێ پرۆژه دێ ده‌ست پێ كه‌ت”.
