ده‌ست ب ڤه‌كرنا گۆڕێن ب كۆم یێن خێزانا دای شمی ل شنگالێ هاته كرن
دهۆك، له‌زگین جوقی:
قایمقامێ ده‌ڤه‌رداریا شنگالێ دیار كر، ده‌ست ب ڤه‌كرنا گۆڕێن ب كۆم یێن قوربانیێن خێزانا دای شمی ل شنگالێ هاته‌كرن كو ل سالا 2014ێ ژلایێ تیرۆرستێن داعش ڤه خێزانا دای شمی هاتیه گولله‌بارانكرن و ناڤ گۆڕێن ب كۆم دا هاتینه ڤه‌شارتن.
مه‌حما خه‌لیل، قایمقامێ ده‌ڤه‌رداریا شنگالێ بۆ رۆژناما ئه‌ڤرۆ ئاشكرا كر كو ل سه‌ر داخوازیا دای شمی قوربانیا جینۆسایدا شنگالێ كو هه‌موو ئه‌ندامێن مالباتا وێ ژلایێ تیرۆرستێن داعش ڤه ل سالا 2014ێ هاتینه گرتن و ره‌ڤاندن و گۆت: “گه‌له‌ك جاران دای شمی داخواز كر گۆڕێن ب كۆم بهێنه ڤه‌كرن، داكو هه‌ستیكێن زارۆكێن خوه راكه‌ت و ببه‌ت د ناڤ گوره‌ستانێ دا ڤه‌شێریت، ل سه‌ر داخوازیا دای شمی ده‌ست ب ڤه‌كرنا گۆڕێ، ب كۆم یێ خێزانا دای شمی ل شنگالێ هاتیه كرن، نوكه ده‌زگه‌هێ شه‌هیدان دگه‌ل نۆشداریا داد ل ئیراقی قه‌ستا شنگالێ كرینه بۆ ڤه‌كرنا گۆڕێن ب كۆم”.
مه‌حما خه‌لیل ئاماژه ب وێ چه‌ندێ ژی كر كو گۆڕا قوربانیێن خێزانا دای شمی دكه‌ڤیته دۆڕیانا تل عزیر د ناڤبه‌را شنگال و شلۆ دا، ئه‌و جه یێ خێزانێن ئێزدیان تێدا هاتینه ره‌ڤاندن و بێ سه‌روشوونكرن، پێدڤی بوو زووتر ئه‌ڤ گۆڕێن ب كۆم هاتبانه ڤه‌كرن، چونكو هه‌موو به‌لگه‌نه بۆ جینۆسایدا شنگالێ و پێدڤیه مافێ قوربانیێن وێ نه‌هێته به‌رزه‌كرن.
ناڤهاتی گۆت: “پتر ژ 30 كه‌سان ژ مالباتا دای شمی د جینۆسایدا شنگالێ دا بووینه قوربانی، گه‌له‌ك ژی د ناڤ گۆڕێن ب كۆم دا هاتینه ڤه‌شارتن، مه ل سه‌ر داخوازیا دای شمی ئه‌و گۆڕێن ب كۆم ڤه‌كرن، ژ به‌ركو هه‌رده‌م دای شمی داخواز دكر رۆفاتێن قوربانیێن خێزانا وێ د ناڤ گۆڕێن ب كۆم دا بهێنه ده‌رئێخستن، مه ئه‌ڤ داخوازیا ڤێ دایكا ئێزدی بجهئینا و نوكه ده‌ست ب كارێ ده‌رئێخستنا رۆفاتێن خێزانا دای شمی هاتیه كرن”.
مه‌حما خه‌لیل زێده‌تر گۆت: “جهێ دلخوشیا مه‌یه، ئومێد و داخوازیا دایكه‌كا ئێزدی بهێته بجهئینان، ئه‌ڤه چه‌ندین سال بوون دای شمی داخواز دكر گۆڕێن ب كۆم بهێنه ڤه‌كرن، دیسا ئه‌م داخوازێ ژ ده‌زگه‌هێن شه‌هیدان و لژنێن ڤه‌كرنا گۆڕێن ب كۆم دكه‌ین، ده‌ست ب ڤه‌كرنا هه‌موو گۆڕێن ب كۆم، ئه‌وێن د ناڤ شنگالێ دا بكه‌ن، داكو هه‌موو ببنه به‌لگه‌نامه بۆ جینۆسایدا شنگالێ و كه‌سوكارێن قوربانیان ژی بهێنه قه‌ره‌بوو كرن و تیرۆرست بهێنه سزادان”.
