بكارئینانا ئه‌ردێ چاندنێ بۆ پڕۆژه‌یان هاته راگرتن
هه‌ولێر، قائید میرۆ:
به‌رپرسه‌كێ وه‌زاره‌تا چاندنێ ئاشكرا كر، بكارئینانا ئه‌ردێ چاندنێ ژبلی كه‌رتێ چاندنێ بۆ هه‌موو مه‌ره‌مێن دی هاتیه راگرتن و دبێژیت: بكارئینانا ئه‌ردێ چاندنێ بۆ هه‌ر پڕۆژه‌یه‌كێ ده‌رڤه‌ی چاندنێ مه‌ترسیه ل سه‌ر ئاسایشا خوارنێ ل هه‌رێما كوردستانێ.
حسێن حه‌مه كه‌ریم، په‌یڤدارێ وه‌زاره‌تا چاندن و ژێده‌رێن ئاڤێ یا حوكمه‌تا هه‌رێما كوردستانێ بۆ رۆژناما ئه‌ڤرۆ دیار كر، د سالێن بۆری دا گه‌له‌ك زێده‌گاڤی ل سه‌ر ئه‌ردێ چاندنێ هاتینه كرن و گۆت: “رێژه‌یه‌كا زۆرا ئه‌ردێ چاندنێ بۆ مه‌ره‌مێن جودا هاتیه بكارئینان، ئه‌ڤێ چه‌ندێ ژی كاریگه‌ریێن زۆر خراپ ل سه‌ر كه‌رتێ چاندنێ هه‌بووینه، چونكو ئه‌ردێ چاندنێ گرێدایی وه‌زاره‌تا دارایی و ئابووریه، به‌لێ ژلایێ وه‌زاره‌تا چاندنێ ڤه دهێته بكارئینان و وه‌زاره‌تا چاندنێ ژ پاراستنا ئه‌ردێ چاندنێ به‌رپرسه، له‌وڕا مه داخواز كریه ئه‌ردێ چاندنێ؛ ژبلی چاندنێ بۆ چو مه‌ره‌مه‌كێ نه‌هێته بكارئینان”.
حسێن حه‌مه كه‌ریم گۆتژی: “ب رێیا سه‌رۆكایه‌تیا جڤاتا وه‌زیران پڕۆژه‌قانوونه‌ك هاتیه به‌رهه‌ڤكرن و تێدا سزایێن بكارئینانا ئه‌ردێ چاندنێ هاتیه دیاركرن، له‌وڕا داخواز دكه‌ین ب چو شێوه‌یه‌كی ئه‌ردێ چاندنێ بۆ مه‌ره‌مێن دی ژبلی پڕۆژێن چاندنێ نه‌هێته بكارئینان، چونكو ئه‌رد زێده نابیت و هه‌رده‌مێ بۆ مه‌ره‌مه‌كا دی بهێته بكارئینان؛ دێ كاریگه‌ری ل سه‌ر ئاسایشا خوارنێ ل هه‌رێما كوردستانێ هه‌بیت”.
