قوتابیێن ئێكێ ل سه‌ر ئاستێ قه‌زا ئامێدیێ هاتنه خه‌لاتكرن
ئامێدیێ، مه‌حمود نهێلی:
د رێوره‌سمه‌كی دا ل هولا چالاكیێن قوتابخانان ل رێڤه‌به‌ریا په‌روه‌ردا ئامێدیێ و ب به‌رهه‌ڤبوونا چه‌ندین رێڤه‌به‌رێن دام و ده‌زگه‌هێن میری و حزبی و سه‌میانێن قوتابیان ل سنوورێ ده‌ڤه‌رداریا ئامێدیێ دوهی 30/11/2021 قوتابیێن سه‌ركه‌فتیێن ئێكێ هاتنه خه‌لاتكرن.
وه‌جیهـ سه‌عید، رێڤه‌به‌رێ په‌روه‌ردا ده‌ڤه‌رداریا ئامێدیێ د په‌یڤه‌كی دا داخوازا سه‌ركه‌فتنێ بۆ قوتابیان كر و سوپاسیا پشته‌ڤانیا ده‌ڤه‌ردارێ ده‌ڤه‌رداریا ئامێدیێ و دام و ده‌زگه‌هێن میری كر بۆ كه‌رتێ په‌روه‌ردێ و گۆت: “ب پشته‌ڤانیا دام و ده‌زگه‌هێن میری ل ده‌ڤه‌رێ دێ شێین كه‌رتێ په‌روه‌ردێ پتر پێشڤه به‌ین”.
د رێوره‌سمان دا 28 قوتابیێن سه‌ركه‌فتیێن ئێكێ یێن سالا خواندنێ 2020 – 2021 ل سه‌ر ئاستێ رێڤه‌به‌ریا په‌روه‌ردا قه‌زا ئامێدیێ یێن پولا نه‌هێ بنه‌ره‌ت و 12 ئاماده‌یی هاتنه خه‌لاتكرن، دیسا سوپاسی پێشكێشی 14 كارگێریێن قوتابخانان هاتنه‌كرن و رێز لێ هاته گرتن ژ به‌ر ئه‌نجامێن باش یێن قوتابێن وان ل سه‌ر ئاستێ ده‌ڤه‌رداریێ كو ژ ده‌هێن ئێكێ هاتین.
