پێشانگه‌هه‌ك بۆ په‌یداكرنا ده‌لیڤێن كاری دێ ل دهۆكێ هێته ڤه‌كرن
ئه‌ڤرۆ، حه‌مۆ محه‌مه‌د:
سه‌نته‌رێ گه‌شه‌پێدان بۆ كاری ل زانكۆیا پۆلیته‌كنیكی یا دهۆك ب هه‌ڤكاری دگه‌ل رێكخراوا NRC یا نه‌رویژی دێ پێشانگه‌هه‌كێ ب پشكداریا 75 كۆمپانی و رێكخراوان بۆ ده‌رچوو و قوتابیێن زانكۆ و په‌یمانگه‌هێن دهۆكێ سوباهی 2/12/2021 و ل ده‌مژێر 10:00 سپێدێ ل ئاڤاهیێ په‌یمانگه‌ها ته‌كنیكی دهۆك دێ ڤه‌كه‌ن.
بێوار سلێمان، مامۆستایێ زانكۆیێ و رێڤه‌به‌رێ سه‌نته‌رێ گه‌شه‌پێدان بۆ كاری ل زانكۆیا پۆلیته‌كنیكی یا دهۆك بۆ رۆژناما ئه‌ڤرۆ دیار كر كو هه‌موو به‌رهه‌ڤی بۆ ڤه‌كرنا ڤێ پێشانگه‌هێ هاتینه كرن و هه‌ماهه‌نگیه‌كا گه‌له‌ك باش ژ لایێ وان ڤه دگه‌ل دام و ده‌زگه‌هێن كه‌رتێ تایبه‌ت هاتینه كرن كو د ڤێ پێشانگه‌هێ دا پشكدارببن و گۆت: “ئه‌و كۆمپانی و رێكخراوێن د ڤێ پێشانگه‌هێ دا د پشكدار، هه‌موو ئه‌ون یێن كو ده‌لیڤێن كاری ل نك وان هه‌ین، ژ به‌ر كو ده‌مێ به‌رهه‌ڤی بۆ پێشانگه‌هێ د هاتنه‌كرن، مه فورمه‌ك ئاراسته‌ی وان كۆمپانی و رێكخراوان كر یێن كو دێ پشكداریێ د پێشانگه‌هێ دا كه‌ن و وان د وێ فورمێ دا دیار كریه كو ده‌لیڤێن كاری یێن ل نك وان هه‌ین، سه‌ره‌رایی ڤێ چه‌ندێ هه‌ژماره‌كا باش یا ده‌لیڤێن راهێنانێ ژی د ڤێ پێشانگه‌هێ دا دێ هێنه په‌یداكرن، ژ به‌ر كو گه‌له‌ك ده‌رچوو و قوتابی هه‌نه ده‌لیڤێن كاری ل كه‌رتێ تایبه‌ت ب ده‌ست دكه‌ڤن، به‌لێ ب شێوه‌یێ پراكتیكی نوزانن وی كاری بكه‌ن و شاره‌زایی تێدا نینه، ژ به‌ر ڤێ چه‌ندێ ئه‌ڤ پێنگاڤه ژی دێ هێته هاڤێتن و فێری كاری ببن”.
ناڤهاتی ئاماژه دا وێ چه‌ندێ كو هه‌موو قوتابی و ده‌رچوویێن زانكۆ و په‌یمانگه‌هێن پارێزگه‌ها دهۆكێ مافێ هه‌ی د ڤێ پێشانگه‌هێ دا به‌رهه‌ڤ ببن و گۆت: “پێشانگه‌ه بۆ ده‌مێ رۆژه‌كێ ب پشكداریا 75 كۆمپانی و رێكخراوێن ل سنوورێ پارێزگه‌ها دهۆكێ كار دكه‌ن دێ یا به‌رده‌وامبیت و هه‌موو پێدڤیێن پێشانگه‌هێ بێ به‌رامبه‌ر ژ لایێ مه ڤه بۆ پشكداران هاتینه دابینكرن و ل دووڤ وێ پلانا ژ لایێ مه ڤه هاتیه دانان، زێده‌تری 90 ده‌لیڤێن كاری بۆ ده‌رچوو و قوتابیان دێ هێنه په‌یداكرن”.
