كۆمه‌لگه‌هه‌كا نۆشداری یا قازانج نه‌ڤێت ل دهۆكێ هاته ڤه‌كرن
ئه‌ڤرۆ، نه‌وزاد هلۆری:
ب مه‌ره‌ما خزمه‌تكرنا نه‌خۆشان و كه‌رتێ ساخله‌میێ، ب ئاماده‌بوونا جێگرێ پارێزگارێ دهۆكێ كۆمه‌لگه‌هه‌كا نۆشداری یا بێ قازانج ل دهۆكێ هاته ڤه‌كرن.
شه‌معون شلیمون، جێگرێ پارێزگارێ دهۆكێ د چارچوڤێ ڤه‌كرنا كۆمه‌لگه‌ها نۆشداری یا مارنرسای دا دیار كر كو ئه‌و وه‌كو كارگێڕیا پارێزگه‌ها دهۆكێ دلخوشن ب ڤه‌كرنا كۆمه‌لگه‌هه‌كا نۆشداری یا ب ڤی ره‌نگی و گوت: “خه‌لكێ مه د چه‌ندین قووناغێن هه‌ستیار دا بۆری یه و تووشی چه‌ندین قه‌یران و نه‌خۆشیان بوویه، پێدڤی ب هندێ یه كو هاریكاریا وان بهێته‌كرن، وه‌ك كارگێریا پارێزگه‌ها دهۆكێ پشته‌ڤانیێ ل هه‌ر بزاڤ و كاره‌كێ كه‌ین كو د به‌رژه‌وه‌ندیا وه‌لاتیان دا بیت”.
ئه‌ترا به‌رخۆ، جێگرێ رێڤه‌به‌رێ كۆمه‌لگه‌ها نۆشداری یا مارنرسای بۆ رۆژناما ئه‌ڤرۆ گوت: “بۆ جارا ئێكێ یه ل سنوورێ پارێزگه‌ها دهۆكێ كۆمه‌لگه‌هه‌كا نۆشداری یا قازانج نه‌ڤێت دهێته ڤه‌كرن، ئه‌ڤ كۆمه‌لگه‌هه دێ خزمه‌ته‌كا باش بۆ كه‌رتێ ساخله‌میێ و وه‌لاتیان ل دهۆكێ ب گشتی و ب تایبه‌ت وه‌لاتیێن كێم ده‌رامه‌ت كه‌ت”.
ئه‌ترا به‌رخۆ زێده‌تر گوت: “كۆمه‌لگه‌هـ ژ كۆمه‌كا خزمه‌تگوزاریێن ساخله‌میێ مینا: راوێژكاری، تاقیگه‌هـ، ده‌رمانخانه، پشكا نه‌خۆشیێن ئافره‌ت و زارۆكبوونێ و چه‌ندین خزمه‌تگوزاریێن دی پێك دهێت، ئه‌ڤ كۆمه‌لگه‌هه ب هاریكاریا دو رێكخراوێن نێڤده‌وله‌تی هاتیه چێكرن، هه‌موو خزمه‌تگوزاریێن وێژی دێ ب بهایێ نه‌خوشخانه‌یێن، حكومی و ب رازیبوونا سه‌ندیكا ده‌رمانسازان و ئالیێن په‌یوه‌ندیدار بیت”.
