رێژه‌یا بێكاریێ ل هه‌رێمێ دێ هێته ئاشكراكرن
هه‌ولێر، قائید میرۆ:
بڕیاره به‌ری هاتنا سالا نوو رێژه‌یا بێكاریێ ل هه‌رێما كوردستانێ بهێته ئاشكراكرن و سه‌رۆكێ ده‌سته‌یا ئامارا هه‌رێمێ ژی دبێژیت: رووپیڤه‌ك ل دۆر دیاركرنا رێژه‌یا بێكاریێ هاتیه كرن و نوكه ئه‌م مژوولی ڤاڤارتنا ئه‌نجاماینه.
سیروان محه‌مه‌د، سه‌رۆكێ ده‌سته‌یا ئامارا هه‌رێما كوردستانێ بۆ رۆژناما ئه‌ڤرۆ دیار كر، به‌ری هه‌یڤه‌كێ رووپیڤه‌ك ل دۆر ره‌وشا بێكاریێ و دیاركرنا رێژه‌یا بێكاریێ ل هه‌رێما كوردستانێ هاتیه ئه‌نجامدان و رێكخراوه‌كا نێڤده‌وله‌تی ژی پشكداری تێدا كریه و گۆت: “پڕۆژێ رووپیڤا بێكاریێ هه‌موو ده‌ڤه‌رێن هه‌رێما كوردستانێ بخوه‌ڤه گرتیه و ئه‌نجام ژی هاتینه كۆمكرن، به‌لێ نوكه كار ل سه‌ر ڤاڤارتنا ئه‌نجامێن رێژا بێكاریێ دهێته كرن و به‌ری سالا نوو ئه‌نجام دێ هێنه راگه‌هاندن و رێژا بێكاریێ دێ هێته دیاركرن”.
سیروان محه‌مه‌د گۆتژی: “ئه‌م دزانین پشتی هاتنا قه‌یرانا دارایی و دامه‌زراندن ژی هاتیه راگرتن بێكاری زێده بوویه، به‌لێ دڤێت بشێویه‌كێ زانستی ئامار بهێنه دیاركرن، ئه‌نجامێن ئامارێن بێكاریێ ژی دێ ده‌ینه وه‌زاره‌تێن په‌یوه‌ندیدار و وه‌زاره‌تا پلاندانانێ، داكو كار ل سه‌ربهێته‌كرن، چونكو بێكاری د كه‌رتێن جودا یا هه‌ی و دڤێت هه‌ر لایه‌نه‌ك دچارچوڤێ كه‌رتێ خوه دا كار بۆ نه‌هێلانا بێكاریێ ل هه‌رێما كوردستانێ بكه‌ت”.
