ماره‌كرنا ژنا دویێ ل دادگه‌ها شێخان د زێده‌بوونێ دایه
شێخان، بارزان مزووری:
پارێزه‌ره‌كا دادگه‌ها شێخان بۆ رۆژناما ئه‌ڤرۆ دیار كر، دادگه‌ها شێخان ئێك ژ وان دادگه‌هێن سه‌ر ب حكومه‌تا ئیراقێ ڤه یه و چ گوهۆڕین د نه‌كه‌فتینه د یاسایێن وێ دا و وه‌كو یاسایێن هه‌رێما كوردستانێ نینن و دبێژیت: ل دادگه‌ها شێخان ژ لایه‌َ یاسایڤه رێ هاتیه دان زه‌لام ژنا دویێ ماره بكه‌ت، له‌و گه‌له‌ك وه‌لاتیێن هه‌رێما كوردستانێ قه‌ستا وێ دكه‌ن بۆ ماره‌كرنا ژنا دویێ.
پارێزه‌ر خه‌یریا سالح، پارێزه‌ر ل دادگه‌ها شێخان ئاشكرا كر كو یاسایێن هه‌رێما كوردستانێ گوهۆڕین یێن ب سه‌ردا هاتین، ژ به‌ر وێ چه‌ندێ گه‌له‌ك وه‌لاتیێن هه‌رێما كوردستانێ ژ پارێزگه‌هێن دهۆك، هه‌ڤلێر و سلێمانیێ ب مه‌ره‌ما ماره‌كرنا ژنا دویێ دهێنه دادگه‌ها شێخان و گۆت: “د ئه‌ڤ ساله دا رێژا ماره‌كرنا ژنا دویێ ل دادگه‌ها شێخان گه‌هشتیه 60% و هه‌تا نوكه ژی خه‌لكه‌كێ زۆر قه‌ستا دادگه‌ها شێخان دكه‌ت بۆ ماره‌كرنا ژنا دویێ”.
وێ پارێزه‌رێ ئاماژه ب وێ چه‌ندێ ژی كر كو رێژا به‌ردانێ ل دادگه‌ها شێخان چ گوهۆڕین نه‌كه‌فتینێ و هه‌ر وه‌كو سالا بۆری یه، به‌لێ ب تنێ رێژا ماره‌كرنا ژنا دویێ زێده بوویه و رۆژ بۆ رۆژێ ژی ئه‌ڤ رێژه یا زێده‌تر لێ دهێت.
