69 سالیا دامه‌زراندنا ئێكه‌تیا ئافره‌تێن كوردستانێ ب چه‌ندین چالاكیان هاته ساخكرن
ئه‌ڤرۆ:
ئه‌ندامه‌كا مه‌كته‌با سكرتاریه‌تا ئێكه‌تیا ئافره‌تێن كوردستانێ ئاشكرا كر كو ب هه‌لكه‌فتا بیره‌وه‌یا 69 سالیا دامه‌زراندنا ئێكه‌تیا ئافره‌تێن كوردستانێ دوهی رۆژا ئێكشه‌مبی ١٢/١٢/٢٠٢١ چه‌ندین چالاكیێن جوراوجور ل سه‌رانسه‌ری هه‌رێما كوردستانێ هاتنه ئه‌نجامدان.
شه‌یما مسته‌فا، ئه‌نداما مه‌كته‌با سكرتاریه‌تا ئێكه‌تیا ئافره‌تێن كوردستانێ بۆ رۆژناما ئه‌ڤرۆ دیار كر كو ئێكه‌تیا ئافره‌تێن كوردستانێ شه‌مالكا خوه یا 69 هه‌لكر و ب ڤێ هه‌لكه‌فتێ دوهی ژ ده‌مژمێر ٩ سپێدێ هه‌تا ٤ ئێڤاری ل باره‌گایێ سكرتاریه‌تێ و هه‌موو ئه‌نجوومه‌ن و ناڤه‌ندێن ئافره‌تان ل هه‌رێما كوردستانێ پێشۆازیا مێهڤان هاته كرن، هه‌روه‌سا ب هه‌مان هه‌لكه‌فت چه‌ندین چالاكیێن ره‌وشه‌نبیری و هونه‌ری و جڤاكی هاتنه ئه‌نجامدان و د هه‌مان ده‌م دا 69 شتلێن داران ژی هاتنه چاندن، سه‌ره‌رایی ڤێ چه‌ندێ خۆلێن ره‌وشه‌نبیری ژی بۆ ئافره‌تان هاتنه ڤه‌كرن.
ناڤهاتیێ ئاماژه دا وێ چه‌ندێ كو ب هه‌لكه‌فتا بیره‌وه‌یا ٦٩ سالیا دامه‌زراندنا ئێكه‌تیا ئافره‌تێن كوردستانێ دێ په‌یمانگه‌هه‌كا تایبه‌ت ب كادران ڤه ل مه‌كته‌با سكرتاریه‌تا ئێكه‌تیا ئافره‌تێن كوردستانێ هێته ڤه‌كرن بۆ پێگه‌هاندنا ئافره‌تێ د بیاڤێ رێكخراوه‌یی و جڤاكی و سیاسی دا.
دیسا هه‌ر ب هه‌مان هه‌لكه‌فت ل شێخان 69 سالیا دامه‌زراندنا ئێكه‌تیا ئافره‌تان ب چه‌ندین چالاكیان هاته ساخكرن و عبدالخالق بابیری، به‌رپرسێ لقێ 20 شێخان یێ پارتی بۆ رۆژناما ئه‌ڤرۆ دیار كر 69 سال بۆرین ل سه‌ر ژیێ ئێكه‌تیا ئافره‌تێن كوردستانێ ئه‌و ئێكه‌تیا بۆ تێكوشینا مافێ ئافره‌تان هاتیه دامه‌زراندن و گۆت: “ڤێ ئێكه‌تیێ د دیرۆكا خوه دا خزمه‌ته‌ك مه‌زن بۆ ئافره‌تێ و تێكوشینا نه‌ته‌وه‌ی كریه و قوربانی ژی داینه”.
دیسا ل ئامێدیێ ژی ب هه‌لكه‌فتا 69 سالیا دامه‌زراندنا ئێكه‌تیا ئافره‌تێن كوردستانێ چه‌ندین چالاكی هاتنه ئه‌نجامدان و ئاخچین جبرائیل، به‌رپرسا ئه‌نجوومه‌نێ ئامێدیێ یا ئێكه‌تیا ئافره‌تێن كوردستانێ بۆ رۆژناما ئه‌ڤرۆ دیار كر كو وان ب فه‌ردیت ب هه‌لكه‌فتا دامه‌زراندنا ئێكه‌تیا ئافره‌تێن كوردستانێ چه‌ند چالاكیان ئه‌نجام بده‌ن.
