خودانێن نانپێژی و سامونخانێن دهۆكێ خرڤه‌بوونه‌كا نه‌رازیبوونێ ئه‌نجام دا
دهۆك، نه‌وزاد هلۆری:
پشكه‌ك ژ خودانێن نانپێژی و سامونخانێن دهۆكێ ب نوونه‌راتیا خودانێن نانپێژی و سامونخانێن پارێزگه‌ها دهۆكێ، دوهی 12/12/2021 ل هه‌مبه‌ر ئاڤاهیێ ده‌ڤه‌رداریا دهۆكێ، خرڤه‌بوونه‌كا نه‌رازیبوونێ ل هه‌مبه‌ر ئاڤاهیێ ده‌ڤه‌رداریا دهۆكێ ئه‌نجام دا.
مه‌روان عه‌دنان، ئێك ژ خرڤه‌بوویان بۆ رۆژناما ئه‌ڤرۆ گوت: “ئه‌م ب نوونه‌راتیا خودانێن نانپێژی و سامونخانێن پارێزگه‌ها دهۆكێ هاتینه، ده‌ڤه‌ردارێ دهۆكێ سۆز دایه مه كو دێ دووڤچوونێ ل سه‌ر گازنده و داخوازیێن مه كه‌ت و بگه‌هینیته پارێزگارێ دهۆكێ، داخوازیێن مه ئه‌ون كو گازوایل و غاز و ئار گه‌له‌ك دگرانن، هه‌كه حوكمه‌ت هاریكاریا مه نه‌كه‌ت، ئه‌م نه‌چارین؛ دێ نانی و سامونان گران كه‌ین یان ژی ده‌رگه‌هێن وان گرین”.
وه‌لات ئیسلام، ئه‌و ژی ئێك ژ خرڤه‌بوویان بوو گوت: “ئه‌ڤه ژ سالا 2017ێ وه‌ره هه‌موو جۆره هاریكاریه‌ك ژلایێ حوكمه‌تێ ڤه بۆ نانپێژی و سامونخانان هاتیه راگرتن، ئه‌ڤێ ژی كارتێكرنێن خراپ ل سه‌ر مه كرینه، ئه‌م ژی ل سه‌ر ئه‌ركێ خوه هه‌موو تشتان دكڕین، مینا: گاز و غاز و ئاری، دیسا باج ل سه‌ر مه زۆر بوویه، مه كرێكار هه‌نه و شول ژی یێ كێمه، له‌وا ئه‌م دخوازین كو هاریكاریا مه بهێته كرن، به‌روڤاژی نه‌چارین ده‌رگه‌هێ سامونخانه و نانپێژیێن خوه بگرین”.
پشكه‌ك ژ وان كه‌سێن خرڤه‌بووی خویا كرن كو ئه‌و بێ ئومێد بووینه، ئاریشا وان بهێته چاره‌سه‌ركرن و دبێژن: ئه‌گه‌ر ئاریشا مه به‌رده‌وام بیت دێ مه هه‌لویستێن دی هه‌بن.
ل سنوورێ پارێزگه‌ها دهۆكێ نێزیكێ 500 سامونخانه و نانپێژی هه‌نه و پتری چار هزار كه‌س تێدا كار دكه‌ن.
