بنگه‌هێ لالش هاریكاریا زیانڤێكه‌فتیێن هه‌ولێرێ دكه‌ت
دهۆك، له‌زگین جوقی
به‌رپرسێ ده‌سته‌یا بلندا بنگه‌هێ لالش یێ ره‌وشه‌نبیری و جڤاكی ل دهۆكێ دیار كر، بنگه‌هێ لالش گوژمێ 10 ملیۆن دیناران بۆ زیانڤێكه‌فتیێن له‌هیان ل هه‌ولێرێ ته‌رخانكرن.
شێخ شامۆ، به‌رپرسێ ده‌سته‌یا بلندا بنگه‌هێ لالش یێ ره‌وشه‌نبیری و جڤاكی ل دهۆكێ بۆ رۆژناما ئه‌ڤرۆ خویا كر، بنگه‌هێ لالش وه‌كو سازیه‌كا ئێزدی ب ئه‌ركێ خوه یێ مرۆڤایه‌تی و نیشتمانی دزانیت هاریكاریا خه‌لكێ زیانڤێكه‌تیێ له‌هیێن پارێزگه‌ها هه‌ولێرێ بكه‌ت، ژ به‌ركو زیانه‌كا مه‌زن گه‌هشتیه وه‌لاتیان و گۆت: “ئه‌م هه‌ڤخه‌مێن خه‌لكێ پارێزگه‌ها هه‌ولێرێینه، ل دووڤ شیانێن خوه دێ ده‌ستێ هاریكاریێ بۆ درێژ كه‌ین، مه ژ پێشینه‌یا ده‌سته‌یا بلندا بنگه‌هێ لالش و نڤیسینگه‌ه و بنگه‌هێن لالش گوژمێ 10 ملیۆن دیناران بۆ زیانڤیكه‌فتیێن له‌هیان ل هه‌ولێرێ ته‌رخانكرن”.
گۆتژی: “ئه‌ڤ هاریكاریا بنگه‌هێ لالش ب رێیا لژنا سه‌رپه‌رشتیا كۆمكرنا هاریكاریان ل پارێزگه‌ها دهۆكێ دێ گه‌هته خه‌لكێ زیانڤێكه‌فتیێ پارێزگه‌ها هه‌ولێرێ”.
ژ لایه‌كێ دیڤه ماجد سه‌ید سالح، جێگرێ پارێزگارێ دهۆكێ بۆ كاروبارێن ته‌كنیكی بۆ رۆژناما ئه‌ڤرۆ دیار كر، كۆمپانیێن دهۆكێ ده‌ست ب ڤه‌گوهاستنا ئامیره‌تێن خوه كرن بۆ هاریكاریكرن و پاقژكرنا به‌رمایكیێن له‌هیێن پارێزگه‌ها هه‌ولێرێ ڤه‌گوهاستینه و كه‌مپینه‌ك ژی ل دهۆكێ ل ژێر ناڤێ (هه‌ولێر نه‌یا ب تنێ یه) بۆ كۆمكرنا هاریكاریان هاته دانان و گۆت: “ئه‌ڤ كه‌مپینا خرڤه‌كرنا هاریكاریان دوهی 18/12/2021 ل پارێزگه‌ها دهۆكێ ده‌ست ب كۆمكرنا هاریكاریان كریه و رۆژانه ژ ده‌مژمێر 10 سپێدی هه‌تا سێی ئێڤاری دێ هاریكاریان وه‌رگریت، هه‌ر خێرخوازه‌كێ بڤێت هاریكاریێ بكه‌ت دشێت قه‌ستا لژنا پارێزگه‌ها دهۆكێ بكه‌ت، لژنا دیوانا پارێزگه‌ها دهۆكێ هاریكاریێن دارایی وه‌ردگریت و رێڤه‌به‌ریا كۆچ و كۆچبه‌ران و به‌رسڤدانا قه‌یرانان ژی دێ هاریكاریێن كه‌لوپه‌لان وه‌رگریت”.
