ئاهه‌نگا سه‌رێ سالێ ل دهۆكێ هاته ڕاگرتن
دهۆك، نه‌وزاد و له‌زگین:
رێڤه‌به‌رێ گشتی یێ گه‌شتوگوزارێ ل پارێزگه‌ها دهۆكێ دیار كر،
بڕیاربوو ب هه‌لكه‌فتا شه‌ڤا سه‌رێ سالێ ئاهه‌نگه‌كا جه‌ماوه‌ری ل پارێزگه‌ها دهۆكێ بهێته ئه‌نجامدان و هه‌موو به‌رهه‌ڤی ژی هاتبوونه كرن، لێ ژ به‌ر له‌هیا ل هه‌ولێرێ دروست بووی و وه‌كو رێزگرتن بۆ قوربانیێن وێ، كو زیانێن گیانی و ماددی هه‌بوون، بڕیار هاته دان ئاهه‌نگا شه‌ڤا سه‌رێ سالێ نه‌هێنه كرن و دبێژیت: ل شوونا وێ ژی مه ده‌ست ب هه‌وه‌كا كۆمكرنا هاریكاریان بۆ زیاندارێن له‌هیێ كر.
د. خه‌یری عه‌لی ئوسۆ، رێڤه‌به‌رێ گشتیێ گه‌شت و گوزارا پارێزگه‌ها دهۆكێ بۆ رۆژناما ئه‌ڤرۆ گوت: “وه‌كو رێزگرتن بۆ قوربانیێن له‌هیا هه‌ولێرێ یا چه‌ند رۆژێن بۆری، كو تێدا زیانێن گیانی و ماددی هه‌بوون، مه وه‌كو رێڤه‌به‌ریا گشتی یا گه‌شت و گوزارا پارێزگه‌ها دهۆكێ هه‌موو ئاهه‌نگێن سه‌رێ سالێ ل پارێزگه‌ها دهۆكێ راگرتن و ل شوونا وان ژی ده‌ست ب هه‌وه‌كا كۆمكرنا هاریكاریان بۆ زیاندارێن له‌هیێ كر”.
زێده‌تر گوت: “بڕیار بوو ژلایێ رێڤه‌به‌ریێ ڤه ئاهه‌نگه‌كا مه‌زن یا جه‌ماوه‌ری ب هه‌لكه‌فتا سه‌رێ سالێ بهێته گێڕان، كو هه‌موو به‌رهه‌ڤی بۆ هاتبوونه كرن، به‌لێ ناهێته‌كرن، دیسا ئه‌م ل گه‌ل خودانێن بنگه‌هێن گه‌شتیاری یێن پارێزگه‌ها دهۆكێ وه‌كی: ئۆتێل، مۆتێل، جهێن گوزاری، هاڤینگه‌هـ … هتد كۆمبووین و رێ ب وان هاتیه‌دان كو بنگه‌هێن خوه ب خه‌ملینن و داشكاندنێ د بهایان دا بۆ گه‌شتیاران بكه‌ن”.
ناڤبری دیار كر ژی كو پێدڤی یه هه‌موو لایه‌ك هه‌ڤكار بن ژ بۆ پشته‌ڤانیكرنا زیاندارێن له‌هیا هه‌ولێرێ و گوت: “هه‌موو ئۆتێل و مۆتێل و جهێن گه‌شتیاری ل سنوورێ پارێزگه‌ها دهۆكێ، ب تایبه‌تی ئه‌وێن د كۆمبوونێ دا پشكدار بووین، ده‌ست ب هه‌وه‌كا كۆمكرنا هاریكاریان هاته كرن بوو زیاندارێن له‌هیان و راده‌ستی لژنا كۆمكرنا هاریكاریان ل پارێزگه‌ها دهۆكێ هاتنه كرن بۆ وێ چه‌ندێ ب رێیا وان ل سه‌ر زیاندارێن له‌هیێ بهێنه به‌لاڤكرن”.
