مه‌زارێ نه‌بی ناحوم ب گوژمێ دو ملیۆن دۆلاران هاته نووژه‌نكرن
شێخان، بارزان مزووری:
رێڤه‌به‌را ناحیا ئه‌لقۆش بۆ رۆژناما ئه‌ڤرۆ دیار كر ب گوژمێ دو ملیۆن دۆلاران و ل ژێر چاڤدێریا نڤیسینگه‌ها سه‌رۆك وه‌زیرێن حكومه‌تا هه‌رێما كوردستانێ، كۆنسولێ ئه‌مریكا ب رێكا رێكخراوه‌كا ئه‌مریكی ب هه‌ڤكاری دگه‌ل حكومه‌تا هه‌رێما كوردستانێ مه‌زارێ نه‌بی ناحوم د ناڤ سه‌نته‌رێ باژێرێ ئه‌لقوش دا نووژه‌ن كر و دبێژیت: د ڤان نێزیكان دا د رێوره‌سمه‌كێ مه‌زن دا ئه‌و مه‌زاره دێ هێته ڤه‌كرن.
لارا زارا، رێڤه‌به‌را ناحیا ئه‌لقۆش خویا كر، ئه‌ڤ مه‌زاره ژلایێ رێكخراوه‌كا تایبه‌ت د بیاڤێ شوونواران دا هاتیه نووژه‌نكرن و هه‌موو ئه‌و كه‌سێن كار ل سه‌ر دكر تایبه‌تمه‌ندێن شوونواران بوون و ل دووڤ شێوازێ شوونواری هاتیه نووژه‌نكرن.
محه‌مه‌د عارف تاتار، شینوارناس بۆ رۆژناما ئه‌ڤرۆ دیار كر، دیرۆكا مه‌زارێ نه‌بی ناحوم بۆ سه‌رده‌مێ هاتنا جوییا بۆ كوردستانێ ل سه‌رده‌مێ ئیمپراتوریه‌تا ئاشووری ڤه‌دگه‌ڕیت، ئه‌ڤ جهێ شوونواری ب گرنگترین جه ژلایێ كۆنسلێ ئه‌مریكاڤه دهێته هژمارتن ژ به‌ر وێ چه‌ندێ گرنگی پێ دهێته دان، ئه‌ڤه ژی وێ چه‌ندێ دگه‌هینیت كو دكه‌ڤن دا كوردستان لاندكا شارستانیه‌تێ بوویه.
