وه‌زیرێ په‌روه‌ردێ دووڤچوونا ئاریشێن په‌روه‌ردا ده‌ڤه‌رداریا ئامێدیێ دكه‌ت
ئامێدیێ، مه‌حمود نهێلی:
ئه‌ندامه‌كا لژنا په‌روه‌ردێ و خواندنا بلند ل په‌رله‌مانێ كوردستانێ بۆ رۆژناما ئه‌ڤرۆ دیار كر، پشتی وێ ل سه‌ر داخوازی و ئاریشێن په‌روه‌ردا ئامێدیێ سه‌را وه‌زاره‌تا په‌روه‌ردێ دایی، وه‌زیرێ په‌روه‌ردێ ل حوكمه‌تا هه‌رێما كوردستانێ دیار كرییه، بۆ دووڤچوونا ئاریشه و كێماسیێن په‌روه‌ردا ئامێدیێ ئه‌و دێ سه‌ره‌دانا ده‌ڤه‌رداریا ئامێدیێ كه‌ت.
گۆلستان باقی نهێلی، ئه‌نداما لژنا په‌روه‌ردێ و خواندنا بلند ل په‌رله‌مانێ كوردستانێ خویا ژی كر كو وێ ل سه‌ر داخوازیا هه‌ژماره‌كا مامۆستا و په‌روه‌ردێ و خه‌لكێ ده‌ڤه‌رێ سه‌ره‌دانا وه‌زاره‌تا په‌روه‌ردێ كرییه و ژلایێ وه‌زیرێ په‌روه‌ردێ ڤه هاتیه پێشوازیكرن و گۆت: “مه‌ره‌ما مه ژ ڤێ سه‌ره‌دانێ گه‌هاندنا وان گله و گازندان بوو، یێن ل سنوورێ په‌روه‌ردا ده‌ڤه‌رداریا ئامێدیێ هه‌ین، دیسا مه به‌ری چه‌نده‌كێ دووڤچوون بۆ وان ئاریشان كرییه و راپۆرته‌كا تێر و ته‌سه‌ل گه‌هاندییه لایه‌نێن په‌یوه‌ندیدار”.
ناڤهاتیێ دیار ژی كر كو وه‌زیرێ په‌روه‌ردێ ته‌كه‌ز ل سه‌ر وێ چه‌ندێ كر، كو یا دشیان دا بیت دێ دووڤچوونا وان ئاریشه و داخوازیان كه‌ت و ئه‌گه‌ر چو ئاسته‌نگ ژی نه‌هێنه پێش دێ د ده‌مه‌كێ نێزیك دا سه‌ره‌دانا په‌روه‌ردا ده‌ڤه‌رداریا ئامێدیێ كه‌ت، داكو ژ نێزیك هایداری ره‌وشا پرۆسا په‌روه‌ردێ بیت ل سنوورێ وێ ده‌ڤه‌رداریێ.
