رێڤه‌به‌ریه‌كا دیت یا گشتی ل زاخۆ هاته دانان
زاخۆ، عه‌لی حاجی:
ب به‌رهه‌ڤبوونا دكتۆر شێرزاد هرۆری، رێڤه‌به‌رێ گشتیێ چاڤدێری و گه‌شه‌پێدانا جڤاكی ل پارێزگه‌ها دهۆكێ دوهی 30/1/2022 د رێوره‌سمه‌كێ تایبه‌ت دا رێڤه‌به‌ریا چاڤدێری و گه‌شه‌پێدانا جڤاكی ل ئیدارا سه‌ربخوه یا زاخۆ وه‌كو رێڤه‌به‌ریا گشتی هاته دانان.
دكتۆر شێرزاد هرۆری، رێڤه‌به‌رێ گشتیێ چاڤدێری و گه‌شه‌پێدانا جڤاكی ل پارێزگه‌ها دهۆكێ د په‌یڤه‌كێ دا گۆت: “د نوكه دا گرنگه ئه‌ڤ رێڤه‌به‌ری یه ل زاخۆ وه‌كو رێڤه‌به‌ریه‌كا گشتی هاتیه دانان، ژ به‌ركو زاخۆ تایبه‌تمه‌ندیا خوه هه‌یه و هه‌ر ده‌ما زاخۆ بوویه ئیداره‌یا سه‌ربخوه، ئه‌م وه‌كو رێڤه‌به‌ریا گشتی یا چاڤدێری و گه‌شه‌پێدانا جڤاكی ل پارێزگه‌ها دهۆكێ ئێكسه‌ر هاتینه سه‌ر خه‌ت، دا كو بشێین ل زاخۆ ژی رێڤه‌به‌ریه‌كا گشتی بدانین و ئه‌ڤ چه‌نده ژی هه‌رزۆ هاته پێش، بێگومان ئه‌ڤه بتنێ تێرا هندێ ناكه‌ت، كو رێڤه‌به‌ریه‌كا گشتی بتنێ ل زاخۆ هه‌بیت، به‌لكو د ده‌مه‌كێ نێزیك ژی دا دێ ده‌رباره‌ی قه‌زا باتیفا ژی بڕیاره‌كێ ده‌ین، ژبه‌ركو پێدڤی یه ئه‌م پشته‌ڤانیه‌كا باش ل قه‌زا باتیفا بكه‌ین و مه سوپرایزه‌ك بۆ قه‌زا باتیفا هه‌یه و د ده‌مه‌ك نێزیك ژی دا دێ ڤێ چه‌ندێ بۆ خه‌لكێ باتیفا دیار كه‌ین”.
به‌یار باڤی، رێڤه‌به‌رێ چاڤدێری و گه‌شه‌پێدانا جڤاكی ل ئیداره‌یا سه‌ربخوه یا زاخۆ ل دۆر ڤه‌كرنا رێڤه‌به‌ریا گشتی گۆت: “ئه‌ڤه پێنگاڤه‌كا گرنگه بۆ ئیداره‌یا سه‌ربخوه یا زاخۆ و ئه‌ڤ بڕیاره ژی دێ خزمه‌ته‌كا باش كه‌ت، به‌لێ یا گرنگ ئه‌وه، كو پشته‌ڤانیه‌كا باشتر ل ڤێ رێڤه‌به‌ریێ بهێته كرن و هه‌ماهه‌نگیا د ناڤبه‌را مه و رێڤه‌به‌ریا گشتی ل دهۆكێ دا باشتر ببیت و ئه‌و هێلا گه‌رم یا هه‌ماهه‌نگیێ د ناڤبه‌را مه دا بمینیت، ئه‌ز باوه‌رم دێ پێنگاڤێن باش هێنه هاڤێژتن، د قووناغا ئێكێ دا رێڤه‌به‌ریا مه بوو رێڤه‌به‌ریه‌كا گشتی و د قووناغێن بهێن دا پێدڤی یه پێنگاڤێن پشته‌ڤانیێ بهێنه هاڤێژتن”.
