پاره‌یه‌كێ زۆر هه‌مبه‌ر وانه‌یێن تایبه‌ت دهێته وه‌رگرتن
هه‌ولێر، قائید میرۆ
وه‌زیرێ په‌روه‌ردێ ئاماژه بڤێ چه‌ندێ كریه، دێ كار بۆ نه‌هێلانا وانه‌یێن تایبه‌ت بكه‌ن و ئه‌ندامه‌كا لیژنا په‌روه‌ردێ و خواندنا بلندژی ئاشكراكر، وانه‌یێن تایبه‌ت دێ هه‌ر مینن، به‌لێ ئه‌گه‌ر گوره‌ی پلانا هاتیه‌دانان ئاستێ قوتابخانێن حوكمه‌تێ بهێته بهێزكرن قوتابی پێدڤی ب مامۆستایێن تایبه‌ت نابیت.
گولستان باقی، ئه‌نداما لیژنا په‌روه‌ردێ لپه‌رله‌مانێ كوردستانێ بۆ رۆژناما ئه‌ڤرۆ دیاركر” دده‌مێ سه‌ره‌دانا وه‌زیرێ په‌روه‌ردێ بۆ په‌رله‌مانێ كوردستانێ لدۆر پرۆژه قانوونا په‌روه‌ردێ به‌حسێ وانه‌یێن تایبه‌ت ژلایێ مامۆستایانڤه هاتیه‌كرن ، ژبه‌ركو هنده‌ك جاران قوتابخانه‌یێن حوكمه‌تێ له‌وانه‌یه وه‌ك پێدڤی كار نه‌كه‌ن بۆ پێگه‌هاندنا قوتابیان، ئه‌ڤه‌ژی بۆیه ئه‌گه‌رێ ڤێ چه‌ندێ قوتابی په‌نایێ بۆ مامۆستایێن تایبه‌ت ببن و پشكداری خۆلێن بهێزكرنێ بكه‌ن، هه‌رچه‌نده وه‌زیری ئاماژه‌كر بۆ نه‌هێلانا وانه‌یێن تایبه‌ت، به‌لێ مه‌ره‌م ئه‌ڤه نینه هه‌ر نوكه ب ئێكجاری گوتنا وانه‌یێن تایبه‌ت ل مالان یان سه‌نته‌رێ فێركرنێ بهێنه قه‌ده‌غه‌كرن، چونكه له‌وانه‌یه ل زۆر وه‌لاتێن دیژی ئه‌ڤه هه‌بیت خه‌لك بچنه وانه‌یێن بهێزكرنێ یان تایبه‌ت، به‌لێ ئه‌م دگه‌ل ڤێ چه‌ندێی نه، پشتی ده‌ركرنا قانوونا په‌روه‌ردێ قوتابخانێن هه‌رێما كوردستانێ بهێنه بهێزكرن و مووچه و شایسته‌یێن مامۆستایان باشتر ببن، كار بهێته‌كرن كه‌رتێ په‌روه‌ردێ بهێته پێشڤه‌برن، ئه‌گه‌ر ئه‌م شیاینه ئه‌ڤان تشتا بكه‌ین و كێماسیێن كه‌رتێ په‌روه‌ردێ تژی بكه‌ین، ئه‌ڤه ئۆتۆماتیكی قوتابی نه‌چار نابن بچنه وانه‌یێن تایبه‌ت، چونكه مه‌ره‌م ژ وانه‌یێن تایبه‌ت ئه‌ڤه قوتابی زێده‌تر فێری زانست و پرۆگرامێن قوتابخانێ ببن، ده‌مێ چو ڤالاهی نه‌مان و ئه‌ڤا لسه‌ر مامۆستا و حوكمه‌تێ هه‌یه هاته بجه ئینان، ئه‌ڤه شیانێن قوتابیان دێ بهێز كه‌ڤن و پێدڤی ب وانه‌یێن ده‌رڤه و خۆلێن تایبه‌ت نابیت.
گولستان باقی ئاماژه‌كر” ناهێته ڤه‌شارتن سالانه هژماره‌كا زۆرا قوتابیان پاره‌یه‌كێ زۆر بۆ وانه‌یێن تایبه‌ت د مه‌زێخن، هه‌تا مامۆستا هه‌نه ب گه‌ره‌نتی وانه‌یێن تایبه‌ت دبێژنه قوتابی، واته دانا پاره هه‌مبه‌ر ده‌رچوونێ ب مه‌رج، ئه‌ڤه‌ژی بوویه ئه‌گه‌رێ مه‌زاختنا پاره‌یه‌كێ زۆر ژلایێ قوتابیانڤه بۆ مامۆستایێن تایبه‌ت، هه‌تا نموونه هه‌نه ب پاره‌یه‌كێ زۆر خه‌یالی وانه‌یێن تایبه‌ت دهێنه گوتن و هه‌مبه‌ر پێدانا وانه‌یێن تایبه‌ت هه‌تا چوار هزار دۆلاران ژی هاتیه وه‌رگرتن ل قوتابی، ئه‌س نابێژم پشتی بهێزكرنا كه‌رتێ په‌روه‌ردێ وانه‌یێن تایبه‌ت نامینن، به‌لێ دێ رێژه‌یه‌كێ زۆر به‌ره‌ف كێمبوونێ چن و قوتابی پێدڤی ب وانه‌یێن تایبه‌ت نابیت، ژلایه‌كێ دیڤه وانه‌یێن تایبه‌ت غه‌دره‌كه ل قوتابیێن هه‌ژار دهێته‌كرن، چونكه ئه‌گه‌ر ل قوتابخانێ بشێوه‌یه‌كێ دروست وانه نه‌هێنه گوتن، ئه‌ڤه قوتابیێن هه‌ژار ئه‌و شیانێن مادی نینه مامۆستایێن تایبه‌ت بگریت و پاره‌یه‌كێ مه‌زێخیت، له‌وڕا هه‌موو شیانێن خۆ ئه‌م وه‌كی لیژنا په‌روه‌رده و وه‌زاره‌ت و حوكمه‌تژی یێ كار دكه‌ن قوتابخانێن حوكمه‌تێ ره‌وشا بهێته باش كرن و گرنگیێن زێده‌تر ب كه‌رتێ په‌روه‌ردێ بهێته‌دان، ئه‌ز باوه‌رم ئه‌گه‌ر پڕۆژه قانوونا په‌روه‌ردێ هاته ده‌ركرن دێ كاریگه‌ری دیاربن لسه‌ر ره‌وشا په‌روه‌ردێ و ئاستێ قوتابیان و مامۆستایانژی.
