رۆژنامه‌كا ئه‌مریكی: ب ده‌هان چه‌كدارێن داعشێ ژ زیندانا حه‌سه‌كێ ره‌ڤینه
ئه‌ڤرۆ:
رۆژنامه‌كا ئه‌مریكی دیار دكه‌ت كو ئارمانجا سه‌ره‌كی یا رێكخستنا تیرۆرستی یا داعشێ ژ ئێرشكرنا ل سه‌ر زیندانا حه‌سه‌كێ بۆ هندێ بوویه دا هنده‌ك ژ سه‌ركردێن خوه و كه‌سێن شاره‌زایێ دروستكرنا بۆمبان بره‌ڤینیت و د ئه‌نجام دا پتر ژ دوسه‌د چه‌كدارێن داعشێ ژ زیندانێ ره‌ڤینه.
رۆژناما نیۆیۆرك تایمز یا ئه‌مریكی د راپۆرته‌كێ دا ئاماژه ب شه‌رێ ل زیندانا حه‌سه‌كێ كریه و د راپۆرتێ دا هاتیه دیار كرن كو رێكخستنا تیرۆرستی یا داعشێ به‌رنامه‌كێ مه‌زن بۆ ره‌ڤاندنا هنده‌ك ژ سه‌ركرده و چه‌كدارێن خوه یێ تایبه‌ت دانابوو و هنده‌ك ژ چه‌كدارێن داعشێ كو بسپۆری دروستكرنا بۆمبان بوون، ژ به‌ر هندێ ژی داعشێ ب هه‌موو شیان و هێزا خوه ڤه ئێرشی زیندانا حه‌سه‌كێ كر، لێ هێزێن سووریا دیموكرات ب هاریكاریا فرۆكێن شه‌ری یێن ئه‌مریكا و ب پشكداریا هێزێن تایبه‌ت یێن ئه‌مریكا شیان رێگریێ ل پیلانا داعشێ بگرن و پیلانا داعشێ ژناڤچوو، لێ د ئه‌نجاما شه‌رێ چه‌ند رۆژان دا پتر ژ دوسه‌د چه‌كدارێن داعشێ شیان بره‌ڤن و هه‌تا نها ژی دیار نینه كا ئه‌و چه‌كدار به‌ر ب كیڤه چوونه، ژ به‌ر هندێ ژی ئه‌مریكا و هێزێن سووریا دیموكرات دووڤچوونا وی بابه‌تی دكه‌ن.
هه‌مان رۆژنامێ ئه‌و یه‌ك ژی دیار كریه كو گه‌له‌ك هوورده‌كاریێن ل دۆر ئێرشا داعشێ یا ل سه‌ر زیندانا حه‌سه‌كێ هه‌تا نها ژی بۆ رایا گشتی نه‌هاتینه ئاشكرا كرن، چونكو دیار نینه كا ئه‌و سه‌ركرده و بسپۆرێن دروستكرنا بۆمبان یێن داعشێ ره‌ڤینه یا نه؟ یا دی هه‌تا نها هێزێن سووریا دیموكرات دیار نه‌كرینه كا ئه‌و ئێرش چاوا هاتیه كرن و هه‌روه‌سا ژ بلێ چه‌كدارێن كو ژ ده‌رڤه ئێرشی زیندانێ كرینه كا شانێن نهێنی یێ داعشێ ل حه‌سه‌كێ ژی پشكداری د وێ ئێرشێ دا كرینه یا نه؟ بێگومان گه‌له‌ك پرسیارێن دی هه‌نه كو دڤێت بۆ رایا گشتی بهێنه ئاشكرا كرن.
هه‌مان رۆژنامێ ئه‌و یه‌ك ژی دیار كریه كو نێزیكی چار هزار چه‌كدارێن داعشێ ل گه‌ل هنده‌ك سه‌ركردێن سه‌ربازی یێن وێ رێكخستنا تیرۆرستی ل زیندانا حه‌سه‌كێ دانه، ئانكۆ ئه‌و زیندان بۆ داعشێ گه‌له‌ك گرنگه، ژ به‌ر هندێ ژی پشتی ئێرشا داعشێ ئه‌مریكا و هنده‌ك وه‌لاتێن دی یێن هه‌ڤپه‌یمانیا شه‌رێ ل دژی داعشێ بریار داینه كو چاره‌سه‌ریه‌كێ بۆ ره‌وشا وێ زیندانێ په‌یدا بكه‌ن، چونكو داعش دشێت جاره‌كا دی ژی ئێرشی وێ زیندانێ بكه‌ت، چونكو ئێرشا به‌ری چه‌ند رۆژان یا داعشێ بێی ئه‌نجام ما و هه‌موو چه‌كدارێن داعشێ یێن كو ئێرشی زیندانێ كری ل گه‌ل هنده‌ك چه‌كدارێن دی یێن د ناڤ زیندانێ دا هه‌موو هاتنه كوشتن.
ئه‌و یه‌ك د ده‌مه‌كێ دایه كو پشتی ئێرشا رێكخستنا تیرۆرستی یا داعشێ ل سه‌ر زیندانا حه‌سه‌كێ وه‌زاره‌تا به‌رگریێ یا ئه‌مریكا و هه‌روه‌سا هه‌ڤپه‌یمانیا نێڤده‌وله‌تی یا شه‌رێ ل دژی داعشێ دیار كرن كو ئه‌و دێ ب هه‌موو ره‌نگه‌كێ پشته‌ڤانیێ ل هێزێن سووریا دیموكرات كه‌ن و دێ ب توندی به‌رسڤا ئێرشێن داعشێ ژی ده‌ن.
چاڤدێرێن سیاسی ژی دیار دكه‌ن كو ئێرشا ل سه‌ر حه‌سه‌كێ نیشا دده‌ت كو داعشێ دڤێت ده‌ست ب قۆناغه‌كا نوو یا شه‌ری بكه‌ت، ب تایبه‌تی ژی داعشێ دڤێت ل سووریێ و ئیراقێ جاره‌كا دی ده‌ست ب كریارێن تیرۆرستی بكه‌ت و دڤێت ل هه‌مبه‌ر به‌رهه‌ڤیێن نها یێن داعشێ هه‌م ئیراق و هه‌م ژی هه‌ڤپه‌یمانیا نێڤده‌وله‌تی یا شه‌رێ ل دژی داعشێ د ئاماده‌باشیێ دا بن.
