كار بۆ رێكخستنا كارێ راگه‌هاندن و رۆژنامه‌ڤانی ل دهۆكێ دهێته كرن
دهۆك، نه‌وزاد هلۆری:
ب مه‌ره‌ما رێكخستنه‌كا باشر و ئاسانكاری د ناڤبه‌را ده‌زگه‌هێن ئه‌منی و ده‌زگه‌هێن راگه‌هاندنێ دا، جڤاتا پارێزگه‌ها دهۆكێ روونشته‌كا تایبه‌ت ل دۆر بابه‌تی ئه‌نجام دا و تێدا به‌حس ل بجهكرن و سه‌ره‌ده‌ریه‌كا باشتر ل گه‌ل ده‌زگه‌هێن راگه‌هاندنێ ژلایێ ده‌زگه‌هێن ئه‌منی ڤه هاته‌كرن.
بێریڤان سه‌لیم، جێگرا سه‌رۆكێ جڤاتا پارێزگه‌ها دهۆكێ د كۆنگره‌یه‌كێ رۆژنامه‌ڤانی دا گوت: “وه‌كو جڤاتا پارێزگه‌ها دهۆكێ ل گه‌ل هه‌موو ئالیێن شوله‌ژێ بزاڤان دكه‌ین، كو ئاسانكاریێن باشتر بكه‌ین، دوهی مه ل گه‌ل سه‌ندیكا رۆژنامه‌ڤان و ده‌زگه‌هێن ئه‌منی بزاڤ هه‌بوون، كو ده‌زگه‌هێن ئه‌منی سه‌ره‌ده‌ریه‌كا باشتر ل گه‌ل ده‌زگه‌هێن راگه‌هاندن و رۆژنامه‌ڤانان بكه‌ن و كار ب قانوونا كارێ راگه‌هاندن و رۆژنامه‌ڤانان د ناڤا دادگه‌هێن هه‌رێما كوردستانێ دا بكه‌ن”.
ئازاد حه‌مه ئه‌مین، نه‌قیبێ سه‌ندیكا رۆژنامه‌ڤانێن كوردستانێ خویا كر، ل سه‌ر ده‌ستپێشخه‌ریا جڤاتا پارێزگه‌ها دهۆكێ و ب ئاماده‌بوونا ده‌زگه‌هێن ئه‌منی و چه‌ند ئالیێن شوله‌ژێ و سه‌ندیكا رۆژنامه‌ڤانان و پشكه‌ك ژ ده‌زگه‌هێن راگه‌هاندنێ كۆمبوونه‌كا به‌رفره‌ه ل جڤاتێ ل دۆر ره‌وشا كارێ رۆژنامه‌ڤانی ل پارێزگه‌ها دهۆكێ هاته ئه‌نجامدان و گۆت: “د كۆمبوونێ دا بزاڤه‌كا خورت هاته كرن، كو ئاسانكاریێن باشتر بۆ كارێ میدیایی ب هه‌ڤكاری ل گه‌ل ده‌زگه‌هێن ئه‌منی بهێته كرن و رێكخستنه‌كا باشتر ژی بكه‌ڤیته كارێ رۆژنامه‌ڤانی و راگه‌هاندنێ، ب گوره‌ی قانوونا كاری یا رۆژنامه‌ڤانان ره‌فتار ل گه‌ل ده‌زگه‌هێن راگه‌هاندنێ و رۆژنامه‌ڤانان بهێته كرن، ده‌رباره‌ی هه‌ر ره‌فتاره و كار و بنپێكرنه‌كا ژلایێ وان ڤه دهێته كرن، بزاڤ و كۆمبوونێن مه دێ د به‌ردوام بن، داكو كێمترین بنپێكاری بهێنه كرن، كو د نوكه دا سال بۆ سالێ كێمترن”.
ئازاد زێده‌تر گۆت: “ژبلی كارێ راگه‌هاندنێ، هه‌ڤده‌م دێ بزاڤێن خورت دێ هه‌بن بۆ كارێ راگه‌هاندنێ ئه‌وێ ب رێیا تورێن جڤاكی هێته كرن”.
ژلایێ خوڤه هێمن سلێمان، به‌رپرسێ راگه‌هاندنا رێڤه‌به‌ریا پۆلیسێن پارێزگه‌ها دهۆكێ گۆت: “مه وه‌كو پۆلیسێن پارێزگه‌ها دهۆكێ په‌یوه‌ندیێن باش ل گه‌ل ده‌زگه‌هێن راگه‌هاندن و رۆژنامه‌ڤانان هه‌نه و دخوازین باشتر ژی بن، ئه‌م به‌رهه‌ڤین بۆ دانا زانیاریان بۆ هه‌موو ده‌زگه‌هان بێ جوداهی و دخوازین كو پێكڤه كاركرنه‌كا باشتر بهێته‌كرن”.
