ده‌لال زاخۆیی: هونه‌رمه‌ند هونه‌ری ناهێلیت، به‌لێ هونه‌ر مرۆڤی دهێلێت
ئه‌ڤرۆ:
سترانبێژی ده‌نگخوه‌ش ده‌لال زاخۆیی ژ سالا 2016 وه‌ره ژ هونه‌ری دووركه‌فتیه، لێ به‌رهه‌مێن وی دزیندینه، چونكو جهێ خوه د دلێ جه‌ماوه‌ری دا كریه و ب تنێ ب شه‌ش سترانێن ژێهاتی شیایه ناڤه‌كی بده‌ستخوه‌ڤه بینیت، ناڤهاتی بۆ ئه‌ڤرۆ دبێژیت: ئه‌ز ژ هونه‌ری دوور نه‌كه‌فتیمه و نه‌شێم ژێ دوور بكه‌ڤم، مۆزیك و ستران د خوینا من دانه، نه‌شێم بێی هونه‌ر بژیم، هه‌ناسه‌یا سیهێن منه، گه‌له‌ك به‌رهه‌مێن باش ل ده‌ف من هه‌نه، لێ چو سپۆنسه‌ر و لایه‌ن نینن خوه لێ بكه‌نه خودان، هه‌كه هه‌بن دێ سۆپاسدار بم، ل ده‌ستپێكێ من به‌رهه‌مێن پاك پێشكێشكرینه و خه‌لكی ب وان به‌رهه‌مان ئه‌ز ناسكریمه، نه‌شێم به‌رهه‌مه‌كێ لاواز پێشكێش بكه‌م و كارێن پاقژ مه‌زاختنه‌كا مه‌زن پێدڤێت ب تایبه‌ت ل ئورۆپا، هه‌كه ئه‌ز ژی دخوازم هه‌ر سال به‌رهه‌مه‌كێ ب رێكوپێك پێشكێش بكه‌م و هه‌كه ره‌وش یا باش بیت و سپۆنسه‌ر هه‌بن به‌رهه‌مێن باش دێ هه‌بن.
ده‌لالی ل دۆر هونه‌رێ بیانی گۆت: دبێژن یێ زمانه‌كی بزانیت ب كه‌سه‌كی دهێته هژمارتن یێ دویان بزانیت ب دویان دهێته هه‌ژمارتن و هۆسا، هه‌كه من داهێنانه‌ك كربیت ئه‌و ژ مۆزیك و سروشتێ كوردستانێ یه، چونكو د دلێ من دایه، ب تایبه‌ت ژی یا به‌هدینان، وه‌كو دی ژی سترانێن بیانی جاران ل ئاهه‌نگێن تایبه‌ت دبێژم ل دووڤ دخوازایێ و ل كه‌نالان جه‌ماوه‌ر داخوازا سترانێن بیانی ژ من دكه‌ن و چه‌ند سترانه‌ك من ژبه‌ركرینه و مۆزیكا كوردی ژی نێزیكی یا ده‌وربه‌رێن مه‌یه، هه‌ر چه‌نده من ستایلێ تایبه‌تێ خوه هه‌یه، لێ خۆشیه‌كا بێ سنوور ژ مۆزیكا بیانی و رۆژئاڤا كلاسیكا تایبه‌ت دبینم، هێشتا ژ زارۆكینیی من گوهداری دكر و مفا ژێ وه‌ردگرت، بنگه‌هێن سه‌ره‌كی یێن مۆزیكی من ژێ زانینه، ئه‌و ژی شیانن مرۆڤ بشێت ب زمانه‌كێ دی سترانان بێژیت هه‌ر چه‌نده تێناگه‌هم ژی، ئه‌ڤجا هونه‌ر په‌یامه‌كه بۆ مرۆڤاتیێ و مولكێ هه‌موو جیهانێ یه كو شیای هه‌می ملله‌تان بگه‌هینته ئێك.
ناڤهاتی ل دۆر ئاستێ هونه‌رێ كوردی دبێژیت: هه‌ر چه‌نده یا ژ من زێده‌یه به‌رسڤا ڤێ پسیارێ بده‌م و ئه‌ز نه مامۆستامه، لێ ب دیتنا من هونه‌رێ كوردی یێ پێشدكه‌ڤیت و دگه‌هیته جیهانێ ب خێرا هونه‌رمه‌ندێن ناڤدارێن ده‌نگخۆش و ئه‌كادیمی ب ماندیبوون ژیانا خوه گۆری هونه‌ری كرین، به‌لێ ئه‌ز خوه ل ده‌سپێكا رێكێ دبینم و هێشتا ژی یێ خوه فێردكه‌م، هێشتا بۆ من دڤێت، پێدڤیه كارێن باشتر بكه‌م، لێ ل ده‌سپێكێ و ل دووماهیێ هه‌ر جه‌ماوه‌ر دادڤانه، جه‌ماوه‌رێ من دلسۆزه و گه‌له‌ك سۆپاسیا وان دكه‌م دكه‌ت كو به‌رده‌وام پسیارا من دكه‌ن و داخوازا به‌رهه‌مێن نوو دكه‌ن، هه‌كه جه‌ماوه‌ر نه‌با دا سترانێ هێلم، لێ حه‌زژێكه‌رێن من ئه‌گه‌رن كو به‌رهه‌مان چێكه‌م و هه‌كه من پێچێببیت تشتێن هه‌ژی دێ پێشكێشی هه‌رچار ئالیێن كوردستانێ كه‌م، هه‌كه پشته‌ڤانی هه‌بیت، هه‌كه مامۆستا (سه‌میر زاخۆیی) نه‌با ده‌لال زاخۆی ژی نه‌دبوو، و هه‌كه من تشته‌كێ باش كربیت، ب تنێ نه‌دشیام لێ ب هاریكاریا هه‌ڤالان ل كوردستانێ بوویه، فه‌ره ئه‌ڤێ بێژین و جه‌ماوه‌ر بزانیت.
