سۆپایێ توركیا سه‌نته‌رێ گوندێ هرۆرێ تۆپباران كر
به‌رواری بالا، زنار تۆڤی:
ئه‌ڤه هه‌یامه‌كه تۆپخانێن سوپایێ توركیا ئه‌وێن ل هنداڤی گوندێ هرۆرێ ل ده‌ڤه‌را به‌رواری بالا یا سه‌ر ب ده‌ڤه‌رداریا ئامێدیێ ڤه، سه‌نته‌رێ گوندێ هرۆرێ تۆپباران دكه‌ن و هه‌تا نوكه چه‌ندین گولله‌تۆپ د ناڤ گوندی داینه و زیانێن مه‌زن یێن ماددی گه‌هاندینه خه‌لكێ گوندی و ژ ئه‌نجامێ وان تۆپبارانان ژی هه‌تا نوكه چه‌ندین وه‌لاتیێن گوندێ هرۆرێ بریندار بووینه.
ئازاد ئه‌دیب، موختارێ گوندێ هرۆرێ، بۆ رۆژناما ئه‌ڤرۆ دیار كر، پشتی ل سالا بۆری سوپایێ توركیا خالێن خوه یێن له‌شكری ل كه‌ڤره‌سۆرێ ل هنداڤ گوندی و ل رۆژهه‌لاتێ گوندی داناین، كو ئه‌و خالا له‌شكری یا ل رۆژهه‌لاتی دانایی، نێزیكی 500 مه‌تران نێزیكی گوندییه و گۆت: “ره‌وشا گوندێ مه گه‌له‌ك خراب بوویه، هه‌روه‌سا ژ ئه‌نجامێ تۆپبارانێن به‌رده‌وام یێن سۆپایێ توركیا، هه‌تا نوكه چه‌ندین وه‌لاتیێن گوندی بریندار بووینه و زیانێن مادی ژی گه‌هشتینه چه‌ندین مالێن گوندیان”.
ئازادی زێده‌تر گۆت: “ئه‌ڤه چه‌ند شه‌ڤه ل سه‌ر ئێك تۆپخانێن سۆپایێ توركیا سه‌نته‌رێ گوندی تۆپباران دكه‌ن، ل شه‌ڤا بۆری 13 گۆلله‌تۆپ ل ناڤ گوندی و ده‌وروبه‌رێن گوندی داینه، دو ژ وان تۆپان ب مالێن وه‌لاتیێن گوندی كه‌فتینه و تۆپه‌ك ب بانێ مالا ئه‌مین عومه‌ری كه‌فتیه و بانێ خانییێ وی كۆنكرییه و گه‌له‌ك زیان گه‌هاندیه مالا وی، هه‌روه‌سا ل شه‌ڤا بۆری تۆپه‌كا دیتر ب ره‌خ مالا تاهر ئه‌حمه‌دی كه‌فتییه و زیان گه‌هاندینه خانییێ وی ژی، هه‌روه‌سا تۆپان زیان گه‌هاندینه چه‌ندین مالێن دیتر ژی و ده‌رگه‌ه و په‌نجه‌رێن وان ژی شكاندینه، نوكه سۆپایێ توركیا تۆپان ب شه‌ڤێ دهاڤێژن و ڤێ چه‌ندێ ترسه‌كا مه‌زن ل ده‌ف خه‌لكێ گوندی په‌یدا كرییه و هه‌كه ب ڤی ره‌نگی تۆپباران یا به‌رده‌وام بیت، خه‌لك دێ نه‌چار بیت، گوندی به‌رده‌ن و گوندێ مه ژی دێ هێته چۆلكرن”.
