ل ئاكرێ گروپێن خوه‌به‌خش به‌رهه‌ڤیێن هه‌لكرنا ئاگرێ نه‌ورۆزێ دكه‌ن
ئاكرێ، ره‌مه‌زان زه‌كه‌یا:
سالانه ل ده‌ڤه‌رداریا ئاكرێ ب هه‌لكه‌فتا جه‌ژنا نه‌ورۆزێ ڤیسته‌ڤاله‌كا مه‌زن دهێته رێكخستن بۆ كه‌رنه‌ڤالا هه‌لكرنا ئاگرێ نه‌ورۆزێ، سه‌ره‌رای، كو ئاكرێ وه‌ك پایته‌ختێ نه‌ورۆزێ هاتیه نیاسین و دو سال بوو ژ به‌ر ڤایرۆسێ كۆرۆنایێ چو رێوره‌سم نه‌بوون، لێ ئه‌ڤ ساله بڕیاره ئاگرێ نه‌ورۆزێ ل ئاكرێ بهێته هه‌لكرن.
عه‌دنان عه‌بدولوه‌هاب، به‌رپرسێ گروپێ خوه‌به‌خشێ پێشمه‌رگه و سه‌رپه‌رشتێ دروستكرنا خه‌تیرێن ئاگرێ نه‌ورۆزێ ل ئاكرێ بۆ ئه‌ڤرۆ گوت: “ئه‌م سالانه ل ده‌ستپێكا هه‌یڤا ئادارێ ده‌ست ب به‌رهه‌ڤیان دكه‌ین بۆ دروستكرنا خه‌تیرێن ئاگرێ نه‌ورۆزێ ل ئاكرێ، د دو سالێن بۆری دا ژ به‌ر ڤایرۆسێ كۆرۆنایێ چو رێوره‌سم نه‌بوون، به‌لێ ئه‌ڤ ساله مه ده‌ست ب به‌رهه‌ڤیان بۆ هه‌لكرنا ئاگرێ نه‌ورۆزێ ل سه‌ر كه‌لا ئاكرێ كرینه”.
عه‌دنان گوتژی: “ئه‌و خه‌تیرێن ئه‌م به‌رهه‌ڤ دكه‌ین رۆژا هه‌لكرنا ئاگرێ نه‌ورۆزێ ب رێكا چه‌ندین گروپێن گه‌نجان دێ ب ئاگرڤه ل سه‌رێ گری ب رێوره‌سمه‌كێ جوان به‌ینه سه‌رێ كه‌لێ، دیسا نه‌ورۆزا ئاكرێ تایبه‌تمه‌ندیا خوه یا هه‌ی و سالانه ل سه‌ر ئاستێ جیهان و ئیراقێ بینه‌رێن هه‌ین، مه دڤێت ئه‌ڤ ساله ژی كاره‌كێ ژ هه‌ژی بۆ كه‌رنه‌ڤالا نه‌ورۆزا ئاكرێ بكه‌ین، نوكه ئه‌م یێ د ده‌ستپێكا به‌رهه‌ڤیان دا و به‌رهه‌ڤیێن مه هه‌تا رۆژا هه‌لكرنا ئاگرێ نه‌ورۆزێ دێ دبه‌رده‌وام بن”.
