گوهدار شێخۆ: سه‌رهلدانا زاخۆ و جه‌ژنا نه‌ورۆزێ ب رێوره‌سمێن تایبت دێ هێنه ساخكرن
زاخۆ، عه‌لی حاجی:
د كۆمبوونه‌كا تایبه‌ت دا پلانا ئێمناهیێ و كارگێری ل ئیداره‌یا سه‌ربخوه یا زاخۆ ب به‌رهه‌ڤبوونا به‌رپرسێن ئێمناهیێ و خزمه‌تگوزاری بۆ هه‌یڤا ئادارێ هاته دارێژتن.
گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ د كۆنگره‌یه‌كێ رۆژنامه‌ڤانی دا دیار كر، بڕیاره ل دووڤ به‌رنامه‌كێ تایبه‌ت رۆژا سه‌رهلدانا باژێرێ زاخۆ و جه‌ژنا نه‌ورۆزێ ل زاخۆ بهێنه ساخكرن و گۆت: “مه د نوكه دا هه‌وه‌كا پاقژكرنێ ل وان ده‌ڤه‌ران ده‌ست پێكریه، یێن خه‌لك بۆ نه‌ورۆزێ دێ قه‌ست كه‌تێ، دا كو وه‌لاتی بشێن قه‌ستا وان ده‌ڤه‌ران بكه‌ن و ب ئارامی ده‌مێ خوه ببۆرینن، دیسا باژێرڤانیا زاخۆ و رێڤه‌به‌ریا هاتنوچوونێ هاتینه راسپاردن د ده‌مه‌كێ نێزیك دا جادده‌یێن سه‌ره‌كی ل بێزهێ و بێتاسێ و شیناڤا و ده‌ڤه‌را تاوكێ نووژه‌ن بكه‌ن، داكو چو ئاریشه بۆ وه‌لاتیان دروست نه‌بن”.
گۆتژی: “د ده‌مه‌كێ نێزیك دا پلانا مه دێ هێته به‌لاڤكرن، له‌و داخوازێ ژی ژ وه‌لاتیێن خوه دكه‌ین، قه‌ستا ده‌ڤه‌رێن ب مه‌ترسی نه‌كه‌ن، داكو ژیانا وان نه‌كه‌ڤیته د مه‌ترسیێ دا، ب تایبه‌ت ژی ل وان ده‌ڤه‌رێن شه‌ڕ لێ هه‌یی و مه دڤێت ب باشترین شێوه خزمه‌تا وه‌لاتیێن خوه بكه‌ین، دیسا دخوازین وه‌لاتی ژی هه‌ست ب به‌رپرسیاره‌تیێ بكه‌ن و د پاراستنا ژینگه‌هێ دا ل گه‌ل مه دهاریكار بن”.
