پارێزگارێ دهۆكێ: ب چو ره‌نگه‌كی رێ ناده‌ین یاری ب رزقێ خه‌لكی بهێته كرن
ئه‌ڤرۆ:
د. عه‌لی ته‌ته‌ر، پارێزگارێ دهۆكێ دوهی 7/3/2022 ل گه‌ل لژنا ئابووری ل پارێزگه‌هێ كۆمبوو، دیسا لژنه راسپارد دووڤچوونا ژێده‌رێن بهایێن كه‌لوپه‌لان ل گه‌ل بهایێن بازاری بكه‌ت و دبێژیت: ب چو ره‌نگه‌كی رێ ناده‌ین یاری ب رزقێ خه‌لكی بهێته كرن یێ ب وی كاری رابیت دێ هێته سزادان.
د كۆمبوونێ دا به‌حس ل گرانبوونا بهایێ كه‌لوپه‌لان و ئه‌گه‌رێن گرانبوونێ و چاوانیا كۆنترۆلكرنا بازاری هاته‌كرن، پارێزگارێ دهۆكێ د په‌یڤه‌كێ دا دوپات كر، كو دڤێت دووڤچوونا بازاری بهێته‌كرن، هه‌روه‌سا لژنا ئابووری ژی راسپارد دووڤچوونا گرانبوونا بهایان هه‌ڤبه‌ركرن ل گه‌ل ژێده‌رێن ئینا كه‌لوپه‌لان بهێته كرن و لژنێن ده‌ڤه‌رداریێن پارێزگه‌ها دهۆكێ سه‌ره‌دانا بازاران بكه‌ن و لایه‌نێن خه‌مسار بهێنه سزادان و گۆت: “به‌هرا ئاهێن خوارنێ یێن هه‌یڤانه بۆ هه‌یڤا ئێك و دو یا دهێته به‌لاڤكرن و دێ یا به‌رده‌وام بیت”.
د. عه‌لی ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانی دا بۆ رایا گشتی راگه‌هاند: “راسته بهایێ هنده‌ك كه‌لوپه‌لان ژ ژێده‌رێ هاتنا وان گرانبوویه، لێ ئه‌ڤه نابیته ئه‌گه‌ر، كو ئێكسه‌ر كارتێكرنێ ل مه بكه‌ت، چونكی هێشتا كه‌لوپه‌لێن د بازاری دا مایی یێن كه‌ڤنن و به‌هرا ئاهێن خوارنێ هزار و 100 ته‌نێن زه‌یتێ و 13 هزار ته‌نێن ئاری ل سه‌ر وه‌لاتیان ل گه‌ل به‌هرا ئاهێن خوارنێ ب هه‌روه دهێنه به‌لاڤكرن”.
پارێزگارێ دهۆكێ گوتژی: “ب چو ره‌نگه‌كی رێ ناده‌ین یاری ب رزقێ خه‌لكی بهێته كرن و یێ ب وی كاری راببیت دێ رووبرووی یاسایێ كه‌ین و دێ هێته سزادان”.
پاشی پارێزگارێ دهۆكێ و د گه‌ل دا لژنێن په‌یوه‌ندیدار ژ نێزیك دووڤچوونا ره‌وشا بازاری كر و سه‌ره‌دانا عمبارێن ئاهێن خوارنێ كر و وه‌لاتی پشتڕاستكرن، كو ئاهێن خوارنێ، ب تایبه‌تی ئار و زه‌یت یێن هه‌ین و ل سه‌ر وه‌لاتیان ب هه‌روه دهێنه به‌لاڤكرن و ئه‌وێن ب بازرگانی دهێنه فرۆتن دووڤچوونه‌كا هوور و به‌رده‌وام ل سه‌ر دێ هێته كرن”.
