فیسته‌ڤاله‌كا فلكلۆری ل دێره‌لۆكێ هاته كرن
ئامێدیێ، مه‌حمود نهێلی:
ب هه‌لكه‌فتا رۆژا جلكێن نه‌ته‌وه‌یی ل سنوورێ ده‌ڤه‌رداریا ئامێدیێ چه‌ندین چالاكی هاتنه ئه‌نجامدان و دیارترین ژ وانا ژی ئه‌نجامدانا فیسته‌ڤه‌له‌كا فلكلۆری بوویه ل ژێر ناڤێ (فلكلۆر ناسناما نه‌ته‌وه‌یانه) ل ئاماده‌یا هه‌ڤبوون ل دێره‌لۆكێ.
نیكار سدقی، رێڤه‌به‌رێ ئاماده‌یا هه‌ڤبوون بۆ رۆژناما ئه‌ڤرۆ دیار كر، ژ بۆ وێ یه‌كێ گه‌نج، ب تایبه‌ت ژی قوتابی ده‌ستپێكه‌كێ ژ فلكلۆر و ره‌سه‌ناتیا خوه بزانن، وان ب فه‌ر دیت ب هه‌لكه‌فتا رۆژا جلكێن نه‌ته‌وه‌یی فیسته‌ڤاله‌كا فلكلۆری بگێرن و گۆت: “د ڤێ فیسته‌ڤالێ دا چه‌ندین جۆرێن خوارنێ یێن كه‌ڤن و كورده‌واری و فلكلۆری هاتنه نیشادان، زێده‌باری نیشادانا ئامیره و كه‌ره‌سته‌یێن فلكلۆری یێن سه‌رده‌مێ به‌رێ دهاتنه بكارئینان بۆ ب رێڤه‌برنا كاروبارێن ژیارا خوه، دیسا جلك و به‌رگێز و له‌وه‌ندیێن كورده‌واری ژی هاتنه نیشادان”.
ناڤهاتی ئاشكرا ژی كر كو ئه‌ڤ فیسته‌ڤاله ژلایێ قوتابی و ب هه‌ڤكاری ل گه‌ل مامۆستا و كه‌سوكارێن قوتابیان هاتیه گێران و گۆت: “مه‌به‌ست ژ ڤێ فیسته‌ڤالێ ئه‌و بوویه، كو ب ده‌نه دیاركرن گه‌لێ كورد خوه‌دی دیرۆك و كه‌لتور و ناسنامه‌یه‌كا كه‌ڤناره و ده‌ستان ژێ به‌رناده‌ین، هه‌تا دگه‌هینه هه‌موو هیڤی و ئومێدێن خوه‌یێن نه‌ته‌وه‌یی”.
