پاركه‌كا هه‌ڤچه‌رخ ل ده‌رگه‌هێ زاخۆ دێ هێته دروستكرن
زاخۆ، عه‌لی حاجی:
كۆمپانیا تویوتا ل سه‌ر مه‌زاختیێن خوه دێ پاركه‌كێ ل سه‌نته‌رێ زاخۆ دروست كه‌ت و ئه‌ندازیارا نه‌خشه‌یێ پاركێ دروست كری دبێژیت: پارك وه‌كو شێوازێ شانێن هنگڤینی هاتیه دیزاینكرن.
دێژین محه‌مه‌د، ئه‌ندازیارا نه‌خشه‌یێ پاركێ دروست كری بۆ رۆژناما ئه‌ڤرۆ گۆت: “ئه‌ڤ پاركه بناڤێ بونزایی، كو ناڤه‌كێ ژاپۆنی یه و ل سه‌ر مه‌زاختیێن كۆمپانیێ و ب سه‌رپه‌رشتی و بجهئینانا ئیداره‌یا سه‌ربخوه یا زاخۆ ڤه دێ هێته دروستكرن، ژ به‌ركو كۆمپانیا تویوتا ژ وه‌لاتێ ژاپۆنێ یه، نه‌خشه‌یێ پاركێ ژ لایێ من ڤه هاتیه دیزاینكرن، كو پارك ب شێوازێ شانێن هنگڤینی هاتیه دیزاینكرن، ئه‌ڤه ژی شێوازه‌كێ نوویه ل زاخۆ دهێته دروستكرن”.
ناڤهاتیێ گۆتژی: “ئه‌ڤ پاركه ژ لایێ كۆمپانیا تویوتا ڤه دێ دیاری بیت بۆ خه‌لكێ زاخۆ، كو ل سه‌ر شێوازه‌كێ جوان و رێكوپێك دێ هێته دانان و جوانیه‌كا دیتر دێ ده‌ته باژێرێ زاخۆ، دیسا بۆ جارا ئێكێ دێ جۆره‌كێ داره‌كا ژاپۆنی بناڤێ (بونزایی) د ناڤ وێ پاركێ دا دێ هێته چاندن، كو ئه‌و داره ژ وه‌لاتێ ژاپۆنێ دێ هێنه ئینان بۆ ڤێ پاركێ، راسته ئه‌ڤ پاركه دێ ژلایێ كۆمپانیێ ڤه هێته دروستكرن، به‌لێ دێ ملكێ حكومه‌تێ بیت”.
دێژین خانێ خویا ژی كر كو پارك ل ده‌رگه‌هێ زاخۆ، ل سه‌ر رووبه‌رێ هزار و 500 مه‌تران دێ هێته دروستكرن و گۆت: “ئه‌ڤ دیاریا كۆمپانیێ ژی بۆ باژێرێ زاخۆ، پشتی وێ چه‌ندێ هات، كو كۆمپانیا ناڤهاتی لقه‌كێ خوه ل باژێرێ زاخۆ ڤه‌كری”.
