شاره‌زایه‌كێ جڤاكی: ماددێن هۆشبه‌ر بووینه ئه‌گه‌رێ به‌ردانێ
هه‌ولێر، قائید میرۆ:
ل گوره‌ی ئامارێن لایه‌نێن په‌یوه‌ندیدار ڤان سالێن دووماهیێ رێژا بكارئینان و بارزگانیێ ب ماددێن هۆشبه‌ر ب شێوه‌یه‌كێ به‌رچاڤ زێده كریه، شاره‌زایه‌كێ جڤاكی ژی بكارئینانا ماددێن هۆشبه‌ر ب مه‌ترسی دزانیت بۆ سه‌ر خێزانان و دبێژیت: دده‌مێ نوكه‌دا ماددێن هۆشبه‌ر ئێك ژ ئه‌گه‌رایه بۆ زێده‌بوونا به‌ردانێ و چه‌ندین هه‌ڤژین جودا بووینه.
جێگر ره‌شید، شاره‌زایێ جڤاكی بۆ ئه‌ڤرۆ دیار كر، زۆر جارا به‌حس دهێته كرن كو ئه‌گه‌رێن به‌ردانێ بۆ بكارئینانا سۆشیال میدیایێ و تۆڕێن جڤاكی ڤه‌دگه‌ڕن و گۆت: (راسته خراب بكارئینانا سۆشیال میدیایێ و تۆڕێن جڤاكی كاریگه‌ری هه‌بوویه ل سه‌ر رێژا به‌ردانێ، به‌لێ دده‌مێ نوكه‌دا ئه‌ڤا مه‌ترسی ل سه‌ر جڤاكێ هه‌رێما كوردستانێ په‌یدا كری و بوویه ئه‌گه‌ره‌كێ بهێز بۆ زێده‌بوونا به‌ردانێ بكارئینانا ماددێن هۆشبه‌ره ژلایێ وه‌لاتیانڤه).
جێگر زێده‌تر گۆت: (مخابن رۆژانه چه‌ندین سكالا و باده‌ك ل رێڤه‌به‌ریا به‌رهنگاربوونا توندۆتیژیێ دژی ژنان و خێزانێ دهێنه تۆماركرن و دبنه ئه‌گه‌رێ به‌ردانێ و چه‌ندین خێزان ژێك جودا دبن، له‌وڕا ئه‌ركێ هه‌موو تاكه‌كێ یه دناڤ جڤاكی دا هشیاریێ به‌لاڤ بكه‌ت لدۆر مه‌ترسیێن بكارئینانا ماددێن هۆشبه‌ر).
شاره‌زایێ جڤاكی ئه‌و چه‌نده ژی گۆت: (هه‌كه به‌ری نوكه ئه‌گه‌رێن جودا هه‌بن بۆ به‌ردانێ، بدیتنا من نوكه ماددێن هۆشبه‌ر ژی بۆینه ئه‌گه‌ره‌كێ بهێز، ژبلی زیانێن ماددی ئه‌و كه‌سێ ماددێن هۆشبه‌ر بكاردئینن ژلایێ جڤاكیڤه ژی زیانێن مه‌زن هه‌نه هه‌م بو كه‌سێ بكار دئینیت هه‌م ژی بۆ خێزان و هه‌ڤژینێن وان، بتایبه‌تی ئه‌و كه‌سێن خێزاندار نابیت ب هیچ شێوه‌یه‌كی نێزیكی ماددێن هۆشبه‌ر ببن).
جێگر ره‌شید دا زانین كو ئه‌ڤ كه‌یسا به‌ری چه‌ند رۆژان كچكه‌كا چار سالی هاتیه هاڤێتن ل هه‌ولێرێ هه‌ر په‌یوه‌ندی ب ماددێن هۆشبه‌رڤه هه‌بو، كو مخابن دایك و باب جودابوون و زارۆك بوویه قوربانی، چونكی یا خویایه دده‌مێ به‌ردانێ دا قوربانیێن ئێكێ زارۆكن و چه‌ندین زارۆك بێ سه‌میان ماینه و مالێن حه‌واندنا زارۆكێن بێ سه‌میان تژی بووینه و گۆت: یا گرنگه خه‌لكێ مه هشیار بیت ژ ئه‌ڤان پیلانێن ب رێیا ماددێن هۆشبه‌ر بۆ هه‌لوه‌شاندنا خێزان و جڤاكێ مه دهێته گێڕان، دده‌مێ نوكه دا هژمارا وان خێزانێن ژ ئه‌گه‌رێ ماددێن هۆشبه‌ر جودابووینه د زێده‌بوونێ دایه و هه‌كه نه‌هێته كۆنتڕۆلكرن پاشه‌رۆژه‌كا خراب دێ بۆ هژماره‌كا زۆر یا خێزانێن كوردستانێ هه‌بیت).
