بسپۆره‌كێ زانستێن سیاسی: ناما بایدنی بۆ سه‌رۆكێ هه‌رێمێ په‌یاما به‌رده‌وامیا پشته‌ڤانیا ئه‌مریكا یه بۆ كوردستانێ
ئه‌ڤرۆ:
بسپۆره‌كێ زانستێن سیاسی دبێژیت، ئه‌و نامه‌یا رۆژا چارشه‌مبیا بۆری ژئالیێ سه‌رۆكێ ئه‌مریكی جۆن بایدن گه‌هشتیه سه‌رۆكێ هه‌رێما كوردستانێ، ئاماژه‌ك بۆ بوو ئیراقێ و هه‌ڤسوویێن كوردستانێ كو ئه‌مریكا هه‌ڤپشكه‌كا گرنگ یا هه‌رێما كوردستانێ یه و ئارامیه‌ك ژی بوو بۆ هه‌رێما كوردستانێ پشتی نیگه‌رانیێن سه‌ركردایه‌تیا كوردی سه‌باره‌ت هێرشا مووشه‌كی ل سه‌ر هه‌ولێرێ.
د. زوبێر ره‌سول، بسپۆرێ زانستێن سیاسی و په‌یوه‌ندیێن هه‌رێمایه‌تی، گۆت” ده‌مێ هێرشا مووشه‌كی یا ئیرانێ بۆ سه‌ر هه‌رێما كوردستانێ، ئه‌مریكا راگه‌هاند ئه‌و مووشه‌كه راسته‌وخوه نه‌هاتبوونه ئاراسته‌كرن بۆ ئه‌مریكا، به‌لكو هاتبوونه ئاراسته‌كرن بۆ به‌رژه‌وه‌ندیێن ئه‌مریكا، ڤه‌خواندنا ڤێ چه‌ندێ ژ ئالیێ هه‌رێما كوردستانێ و خه‌لكێ وێ ب شێوه‌كێ گشتی و هه‌موو پارتێن سیاسی ئه‌وبوو هه‌كه به‌رژه‌وه‌ندیێن ئه‌مریكا راسته‌وخوه نه‌هێنه لێدان، خوه لێ ناكه‌ته خودان، نیگه‌رانی ل ده‌ف هه‌رێما كوردستانێ په‌یدابوو و ئه‌و نێگه‌رانیه ژی هه‌ر به‌رده‌وام بوو، هه‌تاكو ژ ئالیێ سه‌ركردایه‌تیا سیاسی و خه‌لكی ره‌نگڤه‌دانا زۆر هه‌بوو ل ده‌زگه‌هێن راگه‌هاندنێ، ئه‌مریكا ژی هه‌ست كر كو نیگه‌رانیه‌ك یا هه‌ی ل ده‌ف هه‌رێما كوردستانێ، له‌وما ئه‌ڤ نامه‌یا جون بایدن سه‌رۆكێ ئه‌مریكا بۆ نێچیرڤان بارزانی سه‌رۆكێ هه‌رێما كوردستانێ پشته‌ڤانیه‌ك بوو بۆ نووكرنا هاریكاریێ و هه‌ماهه‌نگیێ د ناڤبه‌را هه‌رێما كوردستانێ و ئه‌مریكا”.
د. زوبێر زێده‌تر بۆ مالپه‌رێ فه‌رمی یێ پارتی گۆت” هه‌رێما كوردستانێ جهه‌كێ ئارامه بۆ ئه‌مریكا و چه‌ند وه‌لاتێن دی ژی، ئاسانكاریێن زۆر ژی بۆ ئه‌مریكیان یێن هه‌ین و هه‌رێما كوردستانێ رۆله‌كێ باش ل ئیراقیچ دگێریت، د هه‌مان ده‌م دا ئه‌م و ئیراق د قۆناغا پێكئینانا حوكمه‌تا نوو یا ئیراقێ داینه، دبیت ژ ده‌رڤه نامێ تشتێن دی ژی هه‌بن كو د ناڤبه‌را بالیۆزێ ئه‌مریكا و سه‌رۆكێ هه‌رێمێ دا هاتبنه به‌حسكرن و دبیت ئه‌وژی تێدا بیت كو داخواز ژ سه‌رۆكێ هه‌رێمێ هاتبیته كرن رۆله‌كێ زێده‌تر بگێریت بۆ لێكنێزیكبوونا ئالیێن ئیراقی بۆ پێكئینانا حوكمه‌تا ئیراقێ، هه‌روه‌سا د ڤی ده‌می دا ژی ناكۆكیه‌ك كه‌فته د ناڤبه‌را ئیراقێ و هه‌رێما كوردستانێ، ب تایبه‌ت ل سه‌ر بریارا دادگه‌ها فیدرالی پشتی كو هه‌رێما كوردستانێ پشكه‌ك بیت ژ نه‌خشا وێ وزه‌یا دبیته به‌دیلێ وزێ بۆ پشكه‌كا وه‌لاتێن ئورۆپا، دڤێ چه‌ندێ دا ئه‌مریكا رۆلێ هه‌ڤشێوێ ناڤبری ژی دگێریت، دبیت گه‌له‌ك د ئاگه‌هدار نه‌بین د ناڤبه‌را حوكمه‌تا فیدرالی یا ئیراقێ و حوكمه‌تا هه‌رێما كوردستانێ دا، ئه‌مریكا پشته‌ڤانیا وێ چه‌ندێ دكه تكو نابیت رێ ل وزێ بهێته گرتن”.
دیاركر ژی” نه‌رمیه‌ك د سیاسه‌تا ئه‌مریكا دا ل سه‌رده‌مێ بایدنی دا یا هه‌ی، به‌لێ ئه‌مریكا ئه‌ڤ نامه‌یه بۆ وێ ئێكێ یه كو ئاماژه‌كه ئه‌گه‌ر چ ئه‌م د نه‌رمین دگه‌ل هه‌وه دا، مه‌به‌ست (ل گه‌ل ئیرانێ) به‌لێ هه‌ر دێ پشته‌ڤانیێ ل هه‌رێما كوردستانێ كه‌ین كو هه‌ڤپشكه‌كا مه یا گرنگه”.
ل دووماهیێ دبێژیت” ئه‌و نامه پشت راستیه‌ك بوو بۆ هه‌رێما كوردستانێ كو دێ هه‌ر پشته‌ڤانیا هه‌رێما كوردستانێ كه‌ین و بۆ ئیراقێ و ئیرانێ ژی دبێژیت ئه‌م پشته‌ڤانێن هه‌رێما كوردستانێ نه و بجه ناهێلین”.
