چاڤدێری و گه‌شه‌پێدانا جڤاكی دێ هاریكاریا زارۆیێن ئێزدی كه‌ت
دهۆك، له‌زگین جوقی:
رێڤه‌به‌رێ گشتی یێ چاڤدێری و گه‌شه‌پێدانا جڤاكی ل پارێزگه‌ها دهۆكێ دیار كر كو ئه‌و زارۆكێن ئێزدی یێن ژ ئه‌نجامێ جینۆسایدا شنگالێ بووینه ئێتیم و سێوی وان یێن ئیخستنه د ناڤ به‌رنامێ خوه یێ خوارن و ڤه‌خوارنێ دا و دبێژیت: د ده‌مه‌كێ نێزیك دا د ناڤ چه‌ندین به‌رنامه‌یێن دی دا دێ هێنه دانان و هه‌ڤكاری و پشته‌ڤانیا وان زارۆكان دێ هێته كرن.
د. شێرزاد هرۆری، رێڤه‌به‌رێ گشتی یێ چاڤدێری و گه‌شه‌پێدانا جڤاكی ل پارێزگه‌ها دهۆكێ دیار كر، ئه‌و زارۆك دهێنه پاراستن وه‌كو هه‌موو زارۆكێن دی سه‌ره‌ده‌ری د گه‌ل دا دهێته كرن و گۆت: “ل سه‌نته‌رێ شاریا هنده‌ك زارۆك یێن هاتینه تۆماركرن و ئه‌و زارۆكێن نوكه ل دهۆكێ د ناڤ خانیێ چاڤدێریێ دا دهێنه ب خودانكرن و هه‌مان سه‌ره‌ده‌ریێ ل گه‌ل زارۆكێن جینۆسایدا شنگالێ ژی دێ كه‌ین، چو جوداهی د ناڤبه‌را وان دا ناهێته كرن، هه‌روه‌سا ژی دێ پاره‌یێ هاریكاریێ ژی گه‌هیته زارۆكان و ئه‌و زارۆكێن بچنه قوتابخانێ دێ مه‌زاختیێن وی دابین كه‌ین”.
رێڤه‌به‌رێ گشتی یێ چاڤدێری و گه‌شه‌پێدانا جڤاكی ل پارێزگه‌ها دهۆكێ گۆتژی: “ئه‌م پتر رژدیێ ل سه‌ر دابینكرنا خوارن و ڤه‌خوارنێن وان دكه‌ین، دیسا ب رێیا ڤه‌كۆله‌رێن جڤاكی ژی كار ل سه‌ر وان زارۆكان دهێته كرن، داكو د پاشه‌رۆژێ دا تووشی چو ئاریشه‌یان نه‌بن”.
