نێزیكی 10 مزگه‌فتێن كه‌ڤن و دێرین ل ئامێدیێ هه‌نه
ئامێدیێ، مه‌حمود نهێلی
شوونوارناسه‌كێ ده‌ڤه‌را ئامێدیێ ئاشكرا كر، ل ده‌ڤه‌را ئامێدیێ هژماره‌كا مزگه‌فتان لێ هه‌نه كۆ مێژویا وان ڤه‌دگه‌ریت بۆ سه‌رده‌مێن گه‌له‌ك كه‌ڤن و به‌ری هاتنا ئاینێ ئیسلامێ په‌رستگه‌ه بوون و هنده‌ك ژ وانا هه‌تا نوكه په‌رستن لێ دهێته كرن.
شوونوارناس كوڤان ئیسحان بۆ رۆژناما ئه‌ڤرۆ خویا كر، زێده‌باری هه‌بوونا چار ته‌كیان، پتر ژ 10 مزگه‌فتێن كه‌ڤن و شوونواری ل ده‌ڤه‌را ئامێدیێ هه‌نه و هنده‌ك ژ وانا به‌ری هینگی په‌رستگه‌هبوون و مێژوویا وانا بۆ به‌ری هاتنا ئاینێ ئیسلامێ ڤه‌دگه‌ریت و وه‌ك په‌رستگه‌ه په‌رستن لێ دهاته كرن.
مزگه‌فتا هه‌ری به‌رچاڤ و شوونواری و كه‌ڤن ل ده‌ڤه‌را ئامێدیێ مزگه‌فتا ئامێدیێ ب خوه یه كو مێژوویا وێ بۆ سه‌رده‌مێ به‌دره‌دین لوئلوئی ل چه‌رخێ ١٢ زاینی ڤه‌دگه‌ریت، هه‌تا نوكه ژی په‌رستن لێ دهێته كرن و ئێكه ژ مزگه‌فتێن به‌رنیاسێن ده‌ڤه‌را ئامێدیێ و گۆت: ژ مزگه‌فتێن كه‌ڤنێن ده‌ڤه‌را ئامێدیێ دوو مزگه‌فت ل بامه‌رنێ هه‌نه و دوو ل ئامێدیێ و ئێك ل قه‌دشێ و ئێك ل كیسته، ئێك ژی ل گوندێ ئیسفكا و گۆت: مینبه‌را مزگه‌فتا ئامێدیێ ژلایێ قازیێ مووسلێ یێ ب ناڤێ عه‌بدولایێ كورێ قه‌راجی هاتیه چێكرن.
ناڤهاتی دیاركر، مزگه‌فتێن قه‌دشێ و یا ئیسفكا ل دووڤ ئه‌ندازه‌یا چێكرنا وێ دیار دبیت كو ئه‌ڤه به‌ری ببنه مزگه‌فت دێر بووینه و پاشان پشتی هاتنا ئیسلامێ، بووینه مزگه‌فت، لێ خویا نینه ل چو ساله‌كی هاتینه گوهۆرین و بووینه مزگه‌فت.
و گۆت ژی: هند مزگه‌فت هه‌نه به‌ری هینگی به‌رستگه‌ه بووینه، مینا مزگه‌فتا ئامێدیێ ل ده‌ستپێكی په‌رستگه‌ه بوویه و پاشان بوویه كنیشتا جوهیان و پاشان بوویه دێرا مه‌سیحیان و پاشان بوویه مزگه‌فتا موسلمانان، هه‌ره‌وسا مزگه‌فتا ئیسفكا هه‌یه به‌ری هینگی په‌رستگه‌ه بوویه و مزگه‌فتا قه‌دشێ هه‌یه به‌ری هینگی دێربوویه و مزگه‌فتا بامه‌رنێ ژی هه‌یه به‌ری هینگی دێر بوویه مزگه‌فتا شێخ پیرا میسی هه‌یه ل زێوێ به‌ری هینگی دێر بوویه و یا ئه‌دنێ ژی به‌ری هینگێ دێر بوویه و ئاشكرا كر كو ڤان ئاڤاهیان كارێ خوه یێ ئاینی ژ ده‌ست نه‌دایه و ژ په‌رستگه‌هان بووینه مزگه‌فت.
دیار ژی كر، مزگه‌فتا گوندێ سه‌یداوا ل دووڤ وێ نڤیسارا ل سه‌ر هاتیه توماركرن ل سالا ١٢٢٣ مشه‌ختی هاتیه چێكرن كو نوكه ئه‌و نڤیسین ل سه‌ر مایه و گۆت: مزگه‌فتا موئمینا ل بامه‌رنێ و ل دووڤ ژێده‌رێن مێژویێ دیار دكه‌ن ل چه‌رخێ 16 هاتیه چێكرن، به‌لێ ل دووڤ باوه‌ریا من هێشتا ژ وێ مێژویێ كه‌ڤنتره.
ده‌رباره‌ی قوتابخانه‌یێن ئاینی ژی ناڤهاتی دیاركر، ده‌ڤه‌را ئامێدیێ چه‌ندین قوتابخانێن ئاینی هه‌بووینه ژ وانا ژی قوتابخانا كێسته و قوتابخانا مه‌لا یه‌حیا مزیری و قوتابخانا قوبه‌هان كو ئێك ژ قوتابخانێن گرنگێن ده‌ڤه‌رێ بوویه و ب سه‌دان زانا و شاعیر و مه‌لا ل ڤێ قوتابخانێ ده‌رچووینه.
