په‌یڤدارێ په‌روه‌ردا ئاكرێ : 52% مامۆستایێن سنوورێ ئاكرێ وانه‌بێژن
ره‌مه‌زان زه‌كه‌ریا
ده‌مێ چه‌ندین سالایه ل سنوورێ په‌روه‌ردا ئاكرێ ژماره‌كا زۆرا مامۆستایان وانه‌یا ل قوتابخانێن ناڤ سه‌نته‌رێ باژێری و ده‌رڤه ب ره‌نگێ وانه‌بێژ دده‌نه قوتابیان، به‌لێ هه‌تا نوكه نه‌هاتینه دامه‌زراندن و رێژا مامۆستایێن وانه‌بێژن ل ئاكرێ پتره ژ مامۆستایێن دامه‌زراندی .
سابر عه‌لی په‌یڤدارێ رێڤه‌به‌ریا په‌روه‌ردا قه‌زا ئاكرێ بۆ رۆژناما ئه‌ڤرۆ راگه‌هاند ، سنوورێ په‌روه‌ردا ئاكرێ رێژه‌كا زۆر مامۆستایێن وانه بێژ ب به‌رده‌وامی وانه‌یا ل سه‌نته‌رێ باژێری و ناحیه و گوندێن ده‌رده‌ور دده‌ن قوتابیان، به‌لێ دامه‌زراندنا وان مامۆستایێن وانه بێژ دده‌سهه‌لاتا په‌روه‌ردێ دانینه، و پێدڤیه وه‌زاره‌تا په‌روه‌ردێ ڤێ چه‌ندێ ئێكلا بكه‌ت .
په‌یڤدارێ په‌روه‌ردا قه‌زا ئاگرێ گۆت: ل سنوورێ په‌روه‌ردا ئاكرێ 1200 مامۆستایێن وانه‌بێژ هه‌نه كو دبیته رێژا 52% یا مامۆستایان په‌روه‌ردا ئاكرێ، ئه‌و پاره‌یێ هه‌یڤانه بۆ مامۆستایێن وانه‌بێژێن سنوورێ په‌روه‌ردا ئاكرێ دهێته مه‌زاختن دگه‌هیته پتر ژ 900 ملیۆن دیناران هه‌رده‌مێ پاره دگه‌هیت ئێكسه‌ر لسه‌ر مامۆستایا دهێته به‌لاڤكرن، ئه‌و جارێن كو گیرو دبیت ژی ب ده‌ست مه نینه، ئه‌م حه‌سدكه‌ین به‌رده‌وام سه‌رێ هه‌یڤێ پاره‌یێ وانه‌بێژان بهێته به‌لاڤكرن.
سابر عه‌لی هه‌روه‌سا ئاشكراكر، ئه‌و گازندیێن مامۆستایێن وانه‌بێژ هه‌ی لسه‌ر گیروبوونا به‌لاڤكرنا پاره‌یێ هه‌یڤانه‌یێ وانه‌بێژان ئه‌ڤه كێم خه‌میا په‌روه‌ردا نینه، به‌لكو دزڤریته‌ڤه بۆ وه‌زاره‌تا دارایی ژبه‌ركو هه‌تا بڕیار ل وه‌زاره‌تا دارایی ده‌رنه‌كه‌ڤیت پاره‌یێ وانه‌بێژان ناهێته به‌لاڤكرن، هنده‌ك جارا بڕیارا به‌لاڤكرنا پاره‌یێ مامۆستایێن وانه‌بێژ ژی ده‌ردكه‌ڤیت به‌لێ پارێ پێدڤی د بانكا دا لبه‌ر ده‌ست نینه، كو هه‌یڤانه ل ده‌مێ خۆیێ دیاركری پاره‌یێ مامۆستایێن وانه‌بێژ بهێته به‌لاڤكرن .
ناڤبری لسه‌ر بابه‌تێ دامه‌زراندنا مامۆستایێن وانه‌بێژ دووپاتكر، هه‌تا نوكه چو تشته‌كێ فه‌رمی بو ئێكلاكرنا ڤی بابه‌تی نینه، ئه‌م ژی دخوازین وانه‌بێژ بهێنه دامه‌زراندن و ببنه میلاكێ فه‌رمیێ په‌روه‌ردێ، به‌لێ ئه‌و د ده‌سهه‌لاتا په‌روه‌ردێ دا نینه، و چاڤێ مه ژی ل وه‌زاره‌تا په‌روه‌ردێ كو كار لسه‌ر دامه‌زراندنا وانه‌بێژان بكه‌ت، ده‌نگویه‌ك هه‌یه كو وه‌زاره‌تا په‌روه‌ردێ بڕیاردایه ئه‌گه‌ر دامه‌زراندن یان گرێبه‌ست هه‌بن، بڕیار لسه‌ر بهێته دان وه‌ك په‌روه‌ردا ئاكرێ دێ بریاری لبه‌ر چاڤ گریت و كار لسه‌ر كه‌ت.
