14 تیم بۆ پاراستنا گه‌نمی ژ سۆتنێ هاتنه به‌لاڤكرن
ئاكرێ، ره‌مه‌زان زه‌كه‌ریا:
ل سنوورێ ده‌رڤه‌رداریێن ئاكرێ و به‌رده‌ڕه‌ش و پشكه‌كا شێخان هه‌ژماره‌كا تیمان ژ لایێ به‌ره‌ڤانیا باژێرێ ئاكرێ ڤه هاتنه پێكئینان و ل جهێن جودا ب مه‌به‌ستا پاراستنا گه‌نمێ جۆتیاران ژ سۆتنێ هاتنه به‌لاڤكرن و چه‌ندین رێنمایی ژی به‌لاڤكرینه.
عه‌قید ئیبراهیم فه‌ریق، رێڤه‌به‌رێ به‌ره‌ڤانیا باژێرێ ئاكرێ بۆ ئه‌ڤرۆ گۆت: “ئه‌م سالانه ل وه‌رزێ دروینا گه‌نمی به‌رهه‌ڤیان دكه‌ین بۆ وێ چه‌ندێ گه‌نمێ جۆتیاران ژ سۆتنێ بپارێزین، بۆ ڤێ مه‌به‌ستێ ژی ئه‌ڤ ساله چه‌ندین تیمێن هاتینه پێكئینان و ل ده‌ڤه‌رێ هاتینه به‌لاڤكرن، كو ئه‌ركێ وان دێ پاراستنا گه‌نمێ جۆتیاران بیت ژ سۆتنێ”.
گۆتژی: “ل سنوورێ به‌ره‌ڤانیا باژێرێ ئاكرێ 12 بنگه‌هـ هه‌نه دگه‌ل 16 ترۆمبێلان و نوكه 14 ترۆمبێل دبه‌رهه‌ڤن و 14 خال هاتینه ده‌ستنیشانكرن بۆ پاراستنا گه‌نمێ جۆتیاران ژ سۆتنێ 16 مه‌فره‌زێن گه‌ڕۆك ژی هاتینه به‌رهه‌ڤكرن بۆ هه‌ر حاله‌ته‌كێ چاڤه‌رێ نه‌كری”.
عه‌قید ئیبراهیم زێده‌تر گۆت: “ئه‌م دخوازین وه‌لاتی هاریكار بن ل گه‌ل مه، ب تایبه‌ت شۆفێر، كو جگارێ و پاشمایێن مادێن ڤه‌خوارنێ یێن گازی نه‌هاڤێژن، خودان ده‌راسه ژی د ناڤ ئه‌ردی دا گازێ نه‌كه‌نه ئامیرێن خوه ل ده‌رڤه به‌رهه‌ڤ بكه‌ن ژ لایێ كاره‌بایی و ته‌كنیكی ڤه، سه‌ره‌رای، كو به‌رهه‌ڤیێن باش هاتینه كرن و دخوازین هه‌ر روودانه‌كا هه‌بیت ب له‌ز په‌یوه‌ندی ب مه بهێته كرن ل سه‌ر هه‌ژمارا كۆنترۆلا ئاگر ڤه‌مراندنێ 115″.
