ب گوژمێ هه‌شت ملیار دیناران هه‌ژماره‌كا پڕۆژه‌یان ل باتیفا دهێنه ئه‌نجامدان
زاخۆ، عه‌لی حاجی:
گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ د كۆنگره‌یه‌كێ رۆژنامه‌ڤانی دا دیار كر، ب گوژمێ هه‌شت ملیار دیناران هه‌ژماره‌كا پڕۆژه‌یێن خزمه‌تگوزاری ل ده‌ڤه‌رداریا باتیفا دێ هێنه ئه‌نجامدان و پڕۆژه‌یێ دروستكرنا نه‌خۆشخانه‌یه‌كێ ل وه‌زاره‌تا ساخله‌میێ یه.
گوهدار شێخو گۆت: “ئه‌و پڕۆژه‌یه د بیاڤێن ئاڤ و كاره‌ب و رێ و گه‌له‌ك بیاڤێن دیتر دانه، هنده‌ك ژ وان پ كه‌فتینه د بیاڤێ بجهئینانێ دا و به‌ری بنیاتی بۆ هنده‌كێن دی دێ هێته دانان و ب ئه‌نجامدانا وان پروژه‌یان سیمایێ باتیفا دێ هێته گوهۆڕین، داخوازێ ژ وه‌ربه‌رهێنه‌رێن كوردستانێ دكه‌ین به‌رێ خوه بده‌نه ده‌ڤه‌رداریا باتیفا و پڕۆژه‌یان ل وێ ده‌ڤه‌رێ ئه‌نجام بده‌ن، دیسا پێنج ملیار دینار بۆ دروستكرنا نه‌خۆشخانه‌یه‌كێ ل ده‌ڤه‌رداریا باتیفا هاتینه ته‌رخانكرن و نوكه ئه‌و پڕۆژه‌یه گه‌هشتیه وه‌زاره‌تا ساخله‌میێ و هه‌رده‌مێ رازیبوون ل سه‌ر هاته‌دان ئێكسه‌ر ئه‌و پڕۆژه‌یه دێ كه‌ڤیته د بیاڤێ بجهئینانێ دا”.
ل دووماهیێ گۆت: “سه‌رۆكێ حكومه‌تا هه‌رێما كوردستانێ گرنگیه‌كا تایبه‌ت ب ده‌ڤه‌را باتیفا دده‌ت، ب ڤه‌كرنا پڕۆژه‌یێن پاركا زه‌مبیلفرۆش و پڕۆژه‌یێ گه‌شتیاری یێ سه‌ید غه‌زال دێ ئه‌ڤ ده‌ڤه‌ره زێده‌تر ڤه‌ژه‌نا گه‌شتیاری ب خوه‌ڤه گریت، دیسا جادده‌یا 60 مه‌تریا زاخۆ و جۆتسایدكرنا رێیا زاخۆ بۆ باتیفا ژی دێ هێنه جهئینان”.
