هه‌ژمارێن نوو ێین ترۆمبێلان ب شێوازه‌كێ دی دێ هێنه به‌لاڤكرن
هه‌ولێر، سولین سلێمان:
په‌یڤدارێ رێڤه‌به‌ریا هاتنوچوونا هه‌ولێرێ بۆ رۆژناما ئه‌ڤرۆ دیار كر، وه‌رگرتنا هه‌ژمارێن جوان و نایاب ژ لایێ وه‌لاتیان خواسته‌كا زۆر یا ل سه‌ر هه‌ی و دبێژیت: د نوكه دا مه دانا وان هه‌ژماران یا راوه‌ستاندی، لێ مه فورمه‌ك به‌رهه‌ڤ كریه، كو هه‌ر كه‌سه‌كێ بڤێت ب رێیا فورمه‌كێ داخوازیا وه‌رگرتنا ڤان هه‌ژماران پێشكێشی مه بكه‌ت.
فازل حاجی، په‌یڤدارێ رێڤه‌به‌ریا هاتنوچوونا هه‌ولێرێ گۆت: “گه‌له‌ك داخوازی ل سه‌ر هه‌ژمارێن جوان هه‌یه، دیسا هه‌ر شۆفێره‌كی هه‌ر هه‌ژماره‌ك بڤێت ب هه‌ر پیته‌كێ دشێت داخوازیا وه‌رگرتنێ پێشكه‌شی مه بكه‌ت”.
گۆتژی: “ئه‌و داخوازیێن دهێنه ده‌ف مه، ئه‌م دێ پێشكێشی لژنه‌كا تایبه‌ت كه‌ین و د ده‌مه‌كێ كێم دا ئه‌و داخوازی دێ بۆ هێته بجهئینان، هه‌كه ئه‌و هه‌ژماره و پیت به‌ری هینگێ نه‌هاتبیته دروستكرن”.
فازل حاجی زێده‌تر گۆت: “به‌ری نوكه ئه‌و هه‌ژماره ب دو ملیۆن دیناران بۆ وه‌لاتیان دهاتنه دان، ژ به‌ر كو د نوكه دا گه‌له‌ك داخوازی ل سه‌ر هه‌نه، له‌و پێداچوون بۆ دانا وان هه‌ژماران دێ هێته كرن ب بهایه‌كێ نوو”.
