پارێزگارێ دهۆكێ: قووناغا دویێ یا گه‌هاندنا پڕۆژه‌یێن خزمه‌تگوزاری دێ هێته راگه‌هاندن
ئه‌ڤرۆ:
پارێزگارێ دهۆكێ ل گه‌ل سه‌رۆك و ئه‌ندامێن جڤاتا پارێزگه‌هێ كۆمبوو، د كۆمبوونێ دا هه‌ردو ئالیان به‌حسێ كار و پڕۆژه‌یێن حكومه‌تا هه‌رێما كوردستانێ و پێدڤیێن خه‌لكێ پارێزگه‌هێ ب پڕۆژه‌یێن خزمه‌تگوزاری كر و پارێزگار ژی دبێژیت: ل نێزیك قووناغا دویێ یا گه‌هاندنا پڕۆژه‌یێن خزمه‌تگوزاری دێ هێته راگه‌هاندن.
د. عه‌لی ته‌ته‌ر، پارێزگارێ دهۆكێ دوهی 12/6/2022 ل كوچكا مێهڤانداریان كۆمبوونه‌ك ل گه‌ل فه‌هیم عه‌بدوللا، سه‌رۆكێ جڤاتا پارێزگه‌هێ و ئه‌ندامێن جڤاتێ ژ لیستێن جودا ئه‌نجام دا، د كۆمبوونێ دا به‌حسێ كار و پڕۆژه‌یێن حكومه‌تا هه‌رێما كوردستانێ و پێدڤیێن خه‌لكێ پارێزگه‌هێ ب پڕۆژه‌یێن خزمه‌تگوزاری و پلانا نوو یا كارگێریا پارێزگه‌هێ بۆ بجهئینانا پڕۆژه‌یێن نوو یێن خزمه‌تگوزاری و سه‌ره‌دانا ڤێ دووماهیێ یا پارێزگارێ دهۆكێ بۆ ئه‌مریكا و هاتنا شاندێ باژێرێ گینزفیل ل ویلایه‌تا فلوریدا ل ئه‌مریكا ده‌سته‌خویشكا دهۆكێ بۆ پارێزگه‌هێ و گرنگیا چێكرنا ڤان جۆره په‌یوه‌ندیان دگه‌ل وه‌لاتێن وه‌كو ئه‌لمانیا و فره‌نسا و ئیتالیا و وه‌لاتێن دی ژ پێخه‌مت خورتكرنا په‌یوه‌ندیان د هه‌موو بیاڤان دا هاته كرن.
پارێزگارێ دهۆكێ ته‌كه‌ز كر كو ل ڤان نێزیكان قووناغا دویێ یا گه‌هاندنا پڕۆژه‌یێن خزمه‌تگوزاری دێ هێته راگه‌هاندن و چه‌ندین پڕۆژه‌یێن نوو ل سه‌ر ئاستێ هه‌موو ده‌ڤه‌رداریان و بێ جوداهی دێ هێنه ئه‌نجامدان.
پارێزگاری گۆت: “بزاڤێن مه د به‌رده‌وامن بۆ خوشكرنا ژین و ژیارا وه‌لاتیان و نه‌هێلانا هه‌موو ئاسته‌نگ و گرفتێن دهێنه پێش، ل ده‌مه‌كێ نێزیك گوژمه‌كێ پارێ وان پڕۆژه‌یێن به‌لێنده‌ران ب شێوێ هه‌یڤانه دێ هێته مه‌زاختن، ئه‌وێن به‌ری نوكه كار ل سه‌ر هاتیه كرن”.
پاشی سه‌رۆكێ جڤاتا پارێزگه‌هێ رۆهنكرن دانه چه‌ندین بابه‌تێن گرنگ یێن گرێدای ب ژین و ژیارا خه‌لكێ پارێزگه‌هێ ڤه و داخواز كر كو كارگێریا پارێزگه‌هێ و سازیێن په‌یوه‌ندیدار دووڤچوونێ بۆ بكه‌ن و چاره‌سه‌ریێن گونجای بۆ ببینن.
هه‌ر د كۆمبوونێ دا، ئه‌ندامێن جڤاتێ چه‌ند پسیار و پێشنیار به‌رچاڤكرن و به‌رسڤ ژ لایێ پارێزگارێ دهۆكێ ڤه ل سه‌ر هاته دان.
هه‌ژی گوتنێ یه، كو شاندێ باژێرێ گینزفیل یێ ویلایه‌تا فلوریدا ده‌سته‌خویشكا باژێرێ دهۆكێ به‌رهه‌ڤی ته‌وه‌رێ دووماهیێ یێ كۆمبوونێ بوو.
