كۆنفرانسه‌ك ل دۆر پێشخستنا گه‌شت و گوزارا دێره‌لۆكێ هاته ئه‌نجام دان
مێدیێ، مه‌حمود نهێلی:
ب مه‌ره‌ما پێشخستنا كه‌رتێ گه‌شت و گوزارێ ل ناوچه‌داریا دێره‌لۆكێ، سه‌نته‌رێ پێشه‌نگ یێ ره‌وشه‌نبیری و ب ئاماده‌بوونا دكتۆر خه‌یری عه‌لی ئوسۆ، رێڤه‌به‌رێ گشتی یێ گه‌شت و گوزاری ل پارێزگه‌ها دهۆكێ و هه‌ژماره‌كا كه‌سانێن شاره‌زا و ئه‌كادیمی یێن د بیاڤێ گه‌شت و گوزاری دا كۆنفرانسه‌ك ل دێره‌لۆكێ هاته سازكرن.
د. خه‌یری عه‌لی ئوسۆ رێڤه‌به‌رێ گه‌شت و گوزارێ ل پارێزگه‌ها دهوكێ دیار كر، ژ به‌ر كارئاسانی و پێشوازیا وان یا جوان و پێشێكێشكرنا گولان ل زالگه‌هان بۆ گه‌شتیاران، به‌رێ گه‌شتیاران پتر كه‌فتیه ده‌ڤه‌رێ و رێژا گه‌شتیاران بۆ پارێزگه‌ها دهۆكێ گه‌له‌ك زێده‌بوویه و گۆت: “جارا ئێكێ یه رێژا گه‌شتیاران بگه‌هیته ڤێ رێژێ، كو پتر ملیۆن و 500 هزار گه‌شتیاران سه‌ره‌دانا جهێن گه‌شتیاری یێن ده‌ڤه‌رێ دایه”.
سنوور عه‌دنان، به‌رپرسێ سه‌نته‌رێ پێشه‌نگ یێ ره‌وشه‌نبیری بۆ رۆژناما ئه‌ڤرۆ دیار كر، وان د ڤی كۆنفراسی دا زێده‌باری ئاماده‌كرنا راپۆرته‌كا تێر و ته‌سه‌ل ل سه‌ر كه‌رتێ گه‌شت و گوزاری، وان گه‌نگه‌شه ل سه‌ر چه‌ندین خالێن گرنگ كرن و ئه‌و راپۆرت بۆ لایه‌نێن په‌یوه‌ندیدار دێ هێته بلندكرن.
سنوور گۆت: “ئه‌ڤ كۆنفرانسه دێ یێ به‌رده‌وام بیت و چه‌ندین روونشتنێن دی دێ ب خوه‌ڤه‌گریت، ئه‌م هیڤیدارین، بشێین په‌یاما خوه بگه‌هینینه لایه‌نێن په‌یوه‌ندیدار بۆ وێ یه‌كێ بشێین كه‌رتێ گه‌شت و گوزاری ل ده‌ڤه‌رێ پێشبێخین”.
