د پلانێ دایه خیڤه‌تێن ئاواران ببنه خانی
دهۆك، له‌زگین جوقی
پرۆژه‌ك د گه‌نگه‌شێ دایه بۆ به‌رژوه‌ندیا ئاواران ل سنۆرێ پارێزگه‌ها دهۆكێ، پشتی بریارا دووماهیی ل سه‌ر پرۆژه‌یێ هێته دان هه‌ر ئاواره‌كێ بڤیت دشێت ل جهێ خێڤه‌تا خۆ بلۆكان ئاڤا بكه‌ت ئه‌ڤ ژی دێ ل دووڤ هنده‌ك رێنمایان بیت.
پیر ده‌یان جه‌عفه‌ر، رێڤه‌به‌رێ كۆچ و كۆچبه‌ران و به‌رسڤدانا قه‌یرانا ل پارێزگه‌ها دهۆكێ بۆ ئه‌ڤرۆ راگه‌هاند: ل سه‌ر داخوازیێن به‌رده‌وام یێن ئاواران دێ خیڤه‌ت بنه بلۆك و نوكه گه‌نگه‌شه یا دهێته كرن خیڤه‌تێن ئاواران ببنه بلۆك ل سه‌ر داخوازیا ئاواران و ئه‌ڤه دێ ب كه‌یفا ئاواران بیت، هه‌ر خێزانه‌كا بڤێت ل شوونا خیڤه‌تێ بلۆكان دانیت یێ ئازاده، لێ هێشتا بریارا دووماهیی ل سه‌ر ڤی بابه‌تێ نه‌هاتیه دان و هێشتا د گه‌نگه‌شێ دایه، بۆ وێ چه‌ندێ چه‌وا بیت ئه‌و ئاواره‌یێ خیڤه‌تا خوه بكه‌ته بلۆك دێ سوزنامه‌ك ژێ هێته وه‌رگرتن ل سه‌ر هیچ ئاواره‌كی ناهێته سه‌پاندن، خیڤه‌تا خۆ بگوهۆریت بكه‌ته بلۆك و هه‌موو د ئازادن ل سه‌ر داخوازیا وان ئه‌ڤ پێنگاڤ دهێته هاڤێتن”.
ئاماژه دا وێ چه‌ندێ ژی : “هژمارا ئاواران ل پارێزگه‌ها دهۆكێ زێده‌بوویه د به‌رامبه‌ر ژی دا پشته‌ڤانیا رێكخراوان بۆ ئاواران گه‌له‌ك كێمبوویه، نوكه پتر ژ 327 هزار كه‌سێن ئاواره ل سنورێ پارێزگه‌ها دهۆكێ دژین ئه‌ڤه ژمارا بوویه بارگرانی ل سه‌ر دام و ده‌زگه‌هێن دهۆكێ”.
عه‌لی عومه‌ر، جێگری پارێزگارێ مووسل بۆ كارۆبارێن ئاواران دیاركر: “خیڤه‌ت كه‌ڤنار بووینه و حاله‌تێن ئاگربه‌ربوونێ دناڤ خیڤه‌تان دا دروست دبن و زیان دگه‌هیته ئاواران، له‌ورا ژی ئاواره دحه‌قن بخوازن خیڤه‌تیێن وان بهێنه گوهۆرین، لێ ب دیتنا من هه‌كه كار ل سه‌ر ڤه‌گه‌راندنا ئاواران بهێته كرن باشتره هه‌تا نوكه خه‌لكێ شنگال ئاوارانه نه‌شیاینه ڤه‌گه‌رنه سه‌ر مالێن خۆ به‌هانه‌یا هه‌بونا گرۆپێن چه‌كدار ئاواره ناڤه‌گه‌رن و پێدڤیه كار ل سه‌ر ڤه‌گه‌راندنا ئاواران بهێته كرن “.
