چلهمین سالڤهگهڕا وهغهكرنا سادق بهائهددین ل ئامێدیێ هاته ساخكرن
ئامێدیێ، مهحمود نهێلی:
ل ژێر چاڤدێریا پاریزگارێ دهۆكێ، دهڤهرداریا ئامێدیێ چلهمین سالڤهگهڕا وهغهكرنا نڤیسهر و زمانزانێ كورد (سادق بهائهددین ئامێدی) سازكر و تێدا دو پهنهل ل سهر ژیان و كهساتی و خزمهت و بهرههمێن وی هاتنه پێشكێشكرن.
وارشین سهلمان، دهڤهردارێ ئامێدیێ دیار كر كو ماموستا سادق بهائهددین خزمهتهكا بهرچاڤ پێكێشی ئهدهب و زمانێ كوردی كریه.
حهسهن سلێڤانهی، سهرۆكێ ئێكهتیا نڤیسهرێن كورد تایێ دهوكێ دیار كر، سادق بهائهددین ئامێدی زمانێ كوردی پاراستیه و هوشمهندیا خوه داهێلایه ناڤ رهێن كورمانجیێ دا و گۆت: “ئامێدی شاسوارێ مهیدانا كورمانجی بوو، د دهمهكی دا، كو نڤیسهرێن مه ب تلێن دهستان بوون”.
د. فازل عومهر، سهرنڤیسكارێ رۆژنامهیا ئهڤرۆ د پهنهلێ خوه دا دیار كر كو ئهو گوهۆڕینكاریێن سادق بهائهددین د بیاڤێن ئهدهبیات و زمانێ كوردی دا كرین، بووینه ئهگهرێ زیندیمانا وی د ناڤ رهوشهنبیری و ئهدهبیاتا كوردی دا و گۆت: “د بیاڤێ زمانی دا پرتووكێن وی د بهرنیاسن، ئێكهم كهسه د ڤی بیاڤی دا ل زانكۆیێ شیای رۆلێ خوه ب گێریت، پێنگاڤێن سادق بهائهددین هاڤێژتین بووینه ئهگهرێ ناسینا زاراڤێ بههدینی و بزاڤێن زۆر كرینه، كو زاراڤێ بههدینی بینیته رێزا زاراڤێ سورانی د نڤیسینێ دا، ئهم دشێین بێژین بناغهیێن زاراڤێ كرمانجی نڤیسهر سادق بهائهددین داناینه”.
د. فازل عومهر گۆتژی: “نڤیسهری گرنگیهكا تایبهت دایه ئهدهبیاتا كوردی و ب تایبهت بهرههمێن ههلبهستڤانێن مهزن و دێرینێن كورد، نوكه ژی بهرههمێن وی وهك مهنههج ل گهلهك زانكۆیێن مه دهێته خواندن، زمان ل جهم سادق بهائهددین ناسناما گهلێ كورد بوویه و ژ بهر وێ یهكێ ژی شهڕ ژ بۆ كریه و ئهم ههموو قهردارێن ڤی نڤیسهری نه”.
د. نعمهت حامد نهێلی، د پهنهلێ خوه دا بهحسێ كهساتیا سادق بهائهددین كر و دیار كر، كهسهكێ ل سهر خوه و هێمن و خودان كهساتیهكا بهێز بوو، سادق بهائهددین گهلهك حهز ژ نڤیسینێ دكر و ههر تشتهكێ ل سهر زمانێ كوردی ههبا كۆم دكر و گۆت: “ساد بهائهددین نڤیسهرهكێ بلیمهت بوو، ههژمارهكا زۆرا بهرههمێن ئهدهبی و زمانزانی و ئیدیهم ههنه، شیایه ب رێكا ڤان بهرههمان خزمهتهكا باش پێشكیشێ گهلێ كورد بكهت”.
