ب ته‌قه‌یا سۆپایێ توركیا سێ ژن ل گوندێ كێسته بریندار بوون
به‌رواری بالا، زنار تۆڤی:
ژ ئه‌گه‌رێ توپباران و ته‌قه‌كرنا سۆپایێ توركیا سێ ژن ل گوندێ كێسته ل یێ سه‌ر ب ناوچه‌داریا كانی ماسێ ڤه بریندار بوون، كو سۆپایێ توركیا گوندێ كێسته توپباران كر.
كۆڤان ئه‌حمه‌د، وه‌لاتیه‌كێ گوندێ كێسته‌یه، ل ده‌مێ تۆپباران و ته‌قه‌كرنا سۆپایێ توركیا ل گوندێ كێسته بوو، بۆ رۆژناما ئه‌ڤرۆ گۆت: “ل رۆژا ئه‌ینیا بۆری، ئه‌و بنگه‌هێ سه‌ربازی یێ سۆپایێ توركیا ل چیایێ كالگهۆری ل رۆژئاڤایێ گوندی، چه‌ندین گۆله‌تۆپ ل ده‌ردۆرێن گوندی دان، پشتی هینگێ ب ره‌نگه‌كێ هه‌ره‌مه‌كی ته‌قه كر و چه‌ندین گولله‌یێن دۆشكێ ل ناڤ گوندی كه‌فتن و گه‌له‌ك ژ وان ب دیوارێن مالان كه‌فتین، د ئه‌نجامدا، سێ ژن ب ناڤێن (نازدار، كاژین و فه‌وزیا) بریندار بووینه و گولله‌یێن دۆشكێ ب ده‌ستێ دو ژ وان ژنان كه‌فتینه و گۆلله‌یه‌ك ژی ب سه‌رێ ئێكێ كه‌فتیه”.
دیار كر ژی، هه‌ر زوو ئه‌و هه‌رسێ ژنێن بریندار هاتنه ره‌وانه‌كرن بۆ نه‌خۆشخانێ، داكو چاره‌سه‌ریا وان بهێته كرن، ڤێ روودانێ جاره‌كا دی ترس ل ده‌ف خه‌لكێ گوندی په‌یدا كریه.
