موقته‌دا سه‌در ده‌ست ژ كارێ سیاسی به‌ردده‌ت
ئه‌ڤرۆ:
رێبه‌رێ ره‌وتێ سه‌دری، موقته‌دا سه‌در بریا ردا ب ئێكجارێ كارێ سیاسی بایكۆت بكه‌ت و پتریا ده‌زگه‌هێن ره‌وتێ سه‌دری داخستن.
ل رۆژا دوشه‌مبی 29 ئاب 2022، موقته‌دا سه‌در ل پێگه‌هێ خوه ل سه‌ر تۆرا جڤاكی یا تویته‌ری به‌لاڤكر” من چ جاران داخوازا پیرۆزی و پێگه‌هی زانایی وو سه‌ركردایه‌تی نه‌كریه، به‌لكو تنێ داخوازا چاكیێ و نه‌فره‌تێ ل خرابیێ دكه‌م، چاره‌نڤیسێ بابه‌تان ژی ل ده‌ف خودێ یه” .
دیاركر ژی” تنێ من خواستیه شاشیان راست بكه‌م كو ئالیێن سیاسی یێ شیعی هۆكارێن سه‌ره‌كی بوون، چونكه ئه‌و زۆرینه‌نه، من خواست وان ژ گه‌لێ خوه نێزیك بكه‌م كو هه‌ست ب نه‌هامه‌تیا وی بكه‌ن”.
ئاماژه‌كر” ب ئێكجاری دێ خوه ڤه‌كێشم و هه‌موو ده‌زگه‌هان ژی دێ گرم ژبلی مه‌زارێ پیرۆز و مۆزه‌خانا پیرۆز و و ده‌سته‌یا كولتوورێ بنه‌مالا سه‌در، هه‌كه من وه‌غه‌ركر ژی یا هاتمه كوشتن دخواز فاتیحێ بۆ من بخوینن و لاڤا بۆ من بكه‌ن”.
پشتی بریارا موقته‌دا سه‌در یا ده‌ستبه‌ردانێ ژ كارێ سیاسی. نڤیسینگه‌ها سه‌در د تویته‌كێ دا سێ بریارێن رێبه‌رێ ره‌وتێ سه‌در به‌لاڤكرن و تێدا ئاماژه ب وێ چه‌ندێ هاتیه دان كو پشكداریكرن د كارێ سیاسی، حكومی و هه‌موو داموده‌زگه‌هێن سه‌ر ب حوكمه‌تێ ڤه ب ناڤێ ره‌وتێ سه‌دری ب هه‌موو شێوه‌یه‌كێ قه‌ده‌غه‌یه، هه‌روه‌سا بلندكرنا هه‌موو دروشمێن سیاسی ب ناڤێ ره‌وتێ سه‌دری قه‌ده‌غه‌یه، هه‌روه‌سا نابیت هیچ ده‌زگه‌هه‌كێ راگه‌هاندنێ و مالپه‌رێن تۆرێن جڤاكی ب ناڤێ ره‌وتێ سه‌دری كار بكه‌ن.
