هندهك رێڤهبهریێن نوو دێ ل خانكێ هێنه ڤهكرن
دهۆك، لهزگین جوقی
بریارا سهرۆكێ حكومهتا ههرێما كوردستانێ بۆ ناحیبوونا خانكێ بوویه جهێ دلخۆشیا وهلاتیێن كۆمهلگهها خانكێ و سهرۆكێ باژێرڤانیا خانكێ دبیژیت:” دێ پتر خزمهتگوزاری بۆ خهلكێ خانكێ هێنه پێشكیشكرن و دێ چهندین رێڤهبهریێن دی ل ناحیێ بۆ خزمهتكرنا وهلاتیان هێنه ڤهكرن”.
خهیری جهعفهر، سهرۆكێ باژێرڤانیا خانكێ دیار كر:” بریارا ناحیبوونا خانكێ ژلایێ سهرۆكێ حكومهتا ههرێما كوردستانێ ڤه هاتیه دان، ئهڤه بریارهكا گهلهك گرنگه بۆ خهلكێ خانكێ، ژ بهر كو دێ پتر خزمهتگوزاری بۆ وهلاتیان هێنه پێشكێشكرن و دێ ههموو دام و دهزگههێن حكومهتێ ل خانكێ هێنه ڤهكرن، ئهڤه ب خۆ ژی دێ بیته كارئاسانی و بارسڤكی بۆ وهلاتیان، ههروهسا ژی دێ بهخشینا ههیڤانه بۆ خانكێ هێته دابینكرن و دێ زێده بیت ب تایبهتی ژی ل باژێرڤانیێ دێ پتر شێن خزمهتا خهلكێ خۆ كهین”.
ئاماژه دا وێ چهندێ ژی: “پشتی سهرۆكێ حكومهتا ههرێما كوردستانێ بریار دایی خانكێ ببیته ناحیه، دێ چهندین رێڤهبهرێ هێنه ڤهكرن وهكو رێڤهبهریا كارهبێ و ئاگرڤهمراندنێ و ئاڤێ و ههموو دام و دهزگههێن خزمهتگوزاری دێ ل خانكێ بۆ خزمهتكرنا وهلاتیان هێنه ڤهكرن”.
سهرۆكێ باژێرڤانیا خانكێ، ئاشكهرا كر:” د نهخشهیێ خانكێ دا چهند گوند دهێنه زێدهكرن ل سهر ناحیا خانكێ كو خانكێ ههتا 21 گوندان بخۆڤه دگریت، نوكه دۆرین 25 هزار كهسان تێدا دژین و دێ چهند گوندێن دی ل سهر خانكێ زێدهبن و دێ رێژا ئاكنجیان گههیته دۆرین 30 هزار كهسان، ئهڤه دێ بیته ئهگهر پتر خزمهتگوزارێ بهێنه ئهنجامدان”.
تهكهست كر: “خانكێ ل سهر سكرێ مووسلێ یه، دێ بیته جههكێ گهشتوگوزارێ و دێ پتر دهلیڤین كاركرنێ بۆ خهلكێ خانكێ پهیدابن، ههروهسا دێ پارك و باخچه و جاده پتر ل خانكێ هێنه چێكرن د ههموو وارهكی دا دێ خزمهتا خهلكێ خانكێ هێته كرن، ههروهسا ژی خانكێ رووبهرهكێ مهزنێ ئهردی ههیه بۆ چاندنێ دهێته بكارئینان”.
عنتهر كهلو، بهرپرسێ بنگههێ لالش یێ رهوشهنبیری و كۆمهلایهتی ل خانكێ دیار كر: “ژ مێژهیه خهلكێ كۆمهلگهها خانكێ چاڤهرێ بریارا ناحیبوونا خانكێ دكهن دهمێ بهرێز مسرور بارزانی، سهرۆكێ حكومهتا ههرێما كوردستانی بریار ناحیبوونا خانكێ دایی، خهلك زۆر كهیڤ خوش بووینه، ئهم سوپاسیا سهرۆكێ حكومهتا ههرێما كوردستانێ دكهین ئهم چاڤهرێینه د دهمهكێ نێزیكدا بریار بكهڤته د كاری دا و خزمهتا خهلكێ خانكێ بهێته كرن. خهلك وهسا ههست پێ بكهن ناحیه بوویه ناحیه و ئهو كارێن خهلك دخوازن ژی راستی ژی خانكێ ب خۆ جههكێ گهشتوگوزاری یه، ئاڤ ل خانكێ ههیه و شوونوار ههنه و د شیاندایه مفا ژی بهێته وهرگرتن بۆ پتر خزمهتكرنا خهلكێ خانكێ و دام و دهزگههێن حكومهتێ ل خانكێ بهێنه ڤهكرن، وهكو رێڤهبهریا ئاڤێ و كارهبی و چاندنێ ههموو دام و دهزگههێن دی بهێنه ڤهكرن”.
بهرپرسێ بنگههێ لالش یێ رهوشهنبیری و كۆمهلایهتی ل خانكێ گۆت:” حكومهتا ههرێما كوردستانێ گرنگیهكا مهزن ب دهڤهرێن ئێزدیان ددهت، نوكه ل خانكێ ژی ئێزدی و موسلمان ژی ههنه، لێ پتریا خهلكێ خانكێ ئێزدی نه. هندهك جاده ل خانكێ ههنه ل سالا 1987ێ وهره نههاتنیه چێكرن، پشتی خانكێ بوویه ناحیه ئومێدهك مهزن بۆ وهلاتیان چێبویه و دلخۆش بووینه، ژ بهر كو دێ پتر خزمهت ل خانكێ هێنه ئهنجامدان بۆ وهلاتیان”.
