رێكخراوا GIZ یا ئهلمانی بۆ پارێزگارێ دهۆكێ: ل سهر خزمهتكرنا جوهجه و ئاواره و پهنابهران دێ د بهردهوام بین
ئهڤرۆ:
د. عهلی تهتهر، پارێزگارێ دهۆكێ و شاندێ د گهل دا دوهی 12/9/2022 سهرهدانا بارهگایێ سهرهكی یێ رێكخراوا نێڤدهولهتی GIZ یا ئهلمانی ل باژێرێ بۆن یێ ئهلمانیا كر و ژ لایێ ههردو خانمان ئهنكریت هوڤن، سهرپهرشتا رێكخراوا ناڤبری ل ئهورۆپا و ئاسیا و ئهفریقیا و ئهنداما بۆردێ رێكخراوێ و مارسا كوتیریز، بهرپرسا پلان و ستراتیژیهتا ریكخراوێ پێشوازی لێ هاته كرن.
پارێزگارێ دهۆكێ سلاڤ و رێزێن سهرۆكێ حكۆمهتا ههرێما كوردستانێ گههاندنه رێكخراوێ و رۆلێ وان بلند ههلسهنگاند، د ههڤدیتنهكێ دا باس ل هاریكاریێن مرۆڤایهتی ب تایبهتی بۆ ئاواره و پهنابهران و ئهو خزمهتێن رێكخراوا GIZ پێشكێشكرین كر.
بهرپرسێن بلندێن رێكخراوا GIZ ب پارێزگارێ دهۆكێ راگههاند: ب ههماههنگی و پشتهڤانیا ههوه، ئهم دشێین ب سهركهفتیانه كارێن خوه ئهنجام بدهین و ل دووڤ شیانان دێ د بهردهوام بین.
دیسا ههر دوهی د. عهلی تهتهر، پارێزگارێ دهۆكێ و شاندێ د گهل دا سهرهدانا وهزارهتا كاروبارێن جڤاكی، كو كاروبارێن زارۆك و گهنج و خێزانێ و ههروهسا كۆچ و كۆچبهران ب رێڤهدبهت كر و ژ لایێ خانم جوزیفین پۆل، وهزیرا نوو یا وهزارهتا ناڤبری ل بارهگایێ وهزارهتێ ل پایتهختێ ههرێما باكوورێ ئاڤا راین دوسلدورف پێشوازی لێ هاته كرن.
د ههڤدیتنهكێ دا باس ل ههماههنگی و پشتهڤانیا وان بۆ رهوشا مرۆڤی و ئاواره و پهنابهران و رۆلێ پارێزگههێ د رێڤهبرنا كهمپێن ئاواره و پهنابهران دا كر، دیسا دۆپاتی ل بهردهوامیا پهیوهندیان و ههماههنگیا زێدهتر هاته كرن.
