ئاریشا ڤهگوهاستنا قوتابیان هاته چارهسهركرن و چهندین رێنمایی ژی هاتنه دهركرن
دهۆك، نهوزاد هلۆری:
ب مهرهما نههێلانا پاوانكاریێ د ڤهگوهاستنا قوتابیان دا، ئالیێن شولهژێ ل پارێزگهها دهۆكێ و لژنا پهروهرده و خواندنا بلند ل پهرلهمانێ كوردستانێ كۆمبوون و ل داویێ چارهسهریا پێدڤی بۆ ڤهگوهاستنا قوتابیان هاته دیتن و چهندین رێمایی ژی هاتنه دهركرن.
گولستان نهێلی، ئهنداما لژنا پهروهرده و خواندنا بلند ل پهرلهمانێ كوردستانێ بۆ رۆژناما ئهڤرۆ گۆت: (ب مهرهما نههێلانا پاوانكاری و دووڤچوونێ ل سهر گازندهیێن قوتابی و سهمیانێن وان ل سهر كارێ ڤهگوهاستنا قوتابیان بۆ ناڤهندێن خواندنێ و زانكۆ و پهیمانگههان، مه ل گهل ئالیێن شولهژێ ل پارێزگهها دهۆكێ كۆمبونهكا گرنگ ئهنجام دا و ئهم گههشتینه وی ئهنجامی، كو پاوانكارییهكا زۆر ژ لایێ خودان و نوونهرێن كوستهر و پاسێن ڤهگوهاستنا قوتابیان دهێته كرن و د بهرژهوهندیا قوتابیان دا نینه، لهوا بۆ چارهسهركرنا ڤێ ئاریشێ پێنگاڤێن پێدڤی هاتنه هاڤێتن، داكو ئێدی قوتابی زیاندار نهبن و ب سلامهتی بگههنه قوتابخانه و كۆلیژ و پهیمانگههێن خوه، دیسا زیان ب خودانێن پاس و كوستهران ژی نهكهڤیت).
زێدهتر گۆت: (كومهكا رێنمایان ژی د كۆمبوونێ دا هاتنه دهركرن و ئێدی ههر خودان پاسهكا ڤهگوهاستنا قوتابیان دڤێت پێگیریێ پێ بكهت، ههموو پاسێن ڤهگوهاستنا قوتابیان دڤێت كامیرا چاڤدێریێ د ناڤ پاسێن خوه دا گرێ بدهن، 10 خولهكا بهری دهوام دهست پێ بكهت دڤێت قوتابی بگههنه دهوامێ، نابیت كارگێریێن قوتابخانان مایێ خوه د ڤهگوهاستنێ دا بكهن، بهلكو ئهڤه كارێ سهمیانێن وایه، دڤێت ههموو پێزانینێن شۆفێران ل دهڤ كارگێریێن قوتابخانان ههبن، نابیت كوستهر و پاس زێدهتر ژ قهبارێ كورسیان قوتابیان بار بكهن، ههر بێهنڤهدانهكا ژ پێنج رۆژان دهرباز بیت دڤێت بهایێ رۆژێن ل قوتابیان بهێته زڤڕاندن، بزاڤ بهێنه كرن بۆ كهسوكارێن شههیدان ئهرزانتر بهێته كرن، نابیت شۆفێرێ كوستهر و پاسا لهزاتیێ د ڤهگوهاستنێ دا بكاربینن، بهایێ وان ژی ژ لایێ سهندیكا ڤهگوهاستنێ ڤه دێ هێته دیاركرن، ههموو ئهڤ خاله ژی ل رێكهفتی 1/10/2022ێ دێ هێنه بجهئینان و بهروڤاژی دێ پێرابوونێن یاسایی ل گهل هێنه كرن).
