كۆنفڕانسهك ل دۆر وهرگرتنا قوتابیان ل زانكۆیان دێ هێته ئهنجامدان
ههولێر، قائید میرۆ:
بڕیاره نێزیك كۆنفڕانسهك ل دۆر ههردو كهرتێن پهروهردێ و خواندنا بلند بهێته ئهنجامدان و بڕیاردهرا لیژنا پهروهردێ ژی ل پهرلهمانێ كوردستانێ دبێژیت: بزاڤ دهێنه كرن پیڤهرێ وهرگرتنا قوتابیان ل زانكۆ و پهیمانگههان ب تنێ ل سهر بنهمایێ كۆ نمرهیا پۆلا 12ێ نهبیت.
دكتۆرا گهلاوێژ عوبێد، بڕیاردهرا لیژنا پهروهردێ و خواندنا بلند ل پهرلهمانێ كوردستانێ بۆ رۆژناما ئهڤرۆ دیار كر، ل دهمهكێ نێزیك كۆنفڕانسهكێ گرنگ ل دۆر وهرگرتنا قوتابیان ل زانكۆ و پهیمانگههان دێ هێته ئهنجامدان و گۆت: “كۆنفڕانس ژ لایێ لیژنا پهروهردێ و وهزارهتا خواندنا بلند ڤه ب پشكداریا كهسێن بسپۆر و شارهزا دێ هێته ب رێڤهبرن، دیسا كۆنفڕانس دێ ل دۆر شێوازێ وهرگرتنا قوتابیان بیت، دهمێ پۆلا 12 ئامادهیی تهمام دكهن و ل زانكۆ و پهیمانگههان دهێنه وهرگرتن، ب دیتنا مه سیستهمێ وهرگرتنا قوتابیان پێدڤی ب گۆهۆڕینان ههیه”.
دكتۆرا گهلاوێژ عوبێد گۆتژی: “بزاڤ دهێنه كرن وهرگرتنا قوتابیان ل زانكۆ و پهیمانگههان ب تنێ ل سهر بنهمایێ كۆ نمرهیا پۆلا 12 ئامادهیی نهبیت، ئهم د كۆنفڕانسی دا دێ بزاڤان كهین گۆهۆڕین د ههردو كهرتێن پهروهردێ و خواندنا بلند دا بهێنه كرن، چونكی ههردو كهرتان پێدڤی ب چاكسازی و گوهۆڕینان ههیه و نابیت ههتا ههتا ب ئێك میكانیزم و سیستهم كهرتێ پهروهردێ و خواندنا بلند بهێته ب رێڤهبرن و ب تنێ پۆلا 12 پیڤهر بیت بۆ وهرگرتنا قوتابیان”.
