خیانهتا 16 ئوكتۆبهرێ 330 هزار خێزانێن ئاواره بێ ئومێدكرن
دهۆك، لهزگین جوقی:
رێڤهبهرێ كۆچ و كۆچبهران و بهرسڤدانا قهیرانان ل پارێزگهها دهۆكێ دیار كر، بهری خیانهتا 16ی ئوكتۆبهرێ ل سالا 2017ێ روو بدهت، ئاواره دزڤڕینه شنگالێ، لێ پشتی خیانهتا 16ی ئوكتۆبهرێ روودای خهلك دووباره ژ شنگالێ ئاواره بوون و دبێژیت: ههتا نوكه ژی ژ بهر ههبوونا حهشدا شهعبی و پهكهكێ ئاوارهیان باوهری نینه ڤهگهڕنه شنگالێ.
پیر دهیان جهعفهر، رێڤهبهرێ كۆچ و كۆچبهران و بهرسڤدانا قهیرانان ل پارێزگهها دهۆكێ بۆ رۆژناما ئهڤرۆ ئاشكرا كر، خیانهتا 16ی ئوكتۆبهرا سالا 2017ێ بوو ئهگهر بێ ئومێدی ل نك ئاوارێن شنگالێ دروست ببیت، چونكو حهشدا شهعبی شنگال داگیر كر و د ئهنجام دا ژی گرۆپێن نهشهرعی ژی پتر كونترۆلا شنگالێ كر، ئهڤه بوو ئهگهر ئاوارێن شنگالێ بێ ئومێد ببن و نهزڤڕنه سهر جه و مالێن خوه، ههتا نوكه ژی شنگال مایه و نههاتیه ئاڤهدانكرن و تهناهی لێ پهیدا نهبوویه.
پیر دهیان گۆت: “هێشتا ئاوارهیێن شنگالێ باوهری نینه ڤهگهڕنه سهر مالێن خوه، چونكو دهمێ تهناهی نهبیت خهلك دێ چاوا شێن ڤهگهڕن، ژ بهركو حهشدا شهعبی و گرۆپێن نهشهرعی چهكدارێن خوه ل شنگالێ زێدهكرینه و ناهێلن ئارامی ل دهڤهرێ پهیدا ببیت و ئاواره ڤهگهڕن”.
