ئاژانسه‌كا ئیرانی: گه‌ل و ده‌ستهه‌لاتا نها یا ئیرانێ گه‌له‌ك ژێك دوور كه‌فتینه
ئه‌ڤرۆ:
ئاژانسه‌كا ئیرانێ یا سه‌ر ب سوپایێ پاسداران دیار دكه‌ت كو ده‌نگێ نه‌رازیبوونا وه‌لاتیان ل ئیرانێ رۆژ ب رۆژێ زێده‌تر لێ دهێت و نها گه‌ل و ده‌ستهه‌لات گه‌له‌ك ژێك دوور كه‌فتینه و دڤێت چاره‌سه‌ریه‌كا گونجای بهێته دیتن هه‌كه نه دێ ره‌وش خرابتر لێ هێت.
ئاژانسا ته‌سنیم كو سه‌ر ب سوپایێ پاسداراێن ئیرانێ یه سه‌باره‌ت ب خوه‌نیشادانێن چار حه‌فتیێن بۆری راپۆرته‌ك به‌لاڤكریه و د راپۆرتێ دا هاتیه دیار كرن كو خوه‌نیشادان به‌فره‌هتر لێ هاتینه و د ناڤ جڤاكێ دا گه‌له‌ك ته‌خ و چینێن جودا ژی پشته‌ڤانیێ ل خوه‌نیشادانێن هه‌ی دكه‌ن و هه‌روه‌سا درووشمێن جودا جودا ژی دهێنه به‌لاڤكرن و خوه‌نیشاده‌ران داخوازیێن جودا جودا هه‌نه كو دڤێت گۆهداریا وان بهێته كرن، دڤێت ئالیه‌ته‌ك بهێته دیتن كو ل گه‌ل خوه‌نیشاده‌ران یان ژی ئه‌و كه‌سێن نه‌رازیی دانوستاندن بهێنه‌كرن، ب توندوتیژیێ ره‌وشا هه‌ی ناهێته چاره‌سه‌ركرن.
هه‌مان ئاژانسێ ئه‌و یه‌ك ژی دیار كریه كو گه‌ل و ده‌ستهه‌لات نها گه‌له‌ك ژێك دوور كه‌فتینه، د ناڤ ده‌ستهه‌لاتێ دا خه‌مساری هه‌یه و گوهداریا داخوازیێن خه‌لكی ناهێته كرن ژ به‌ر هندێ ژی نها ره‌وش ئالۆزتر لێ هاتیه، هه‌كه ل سه‌ر هنده‌ك رێیێن چاره‌سه‌ریێ كار نه‌هێته كرن ره‌وشا نها دێ زیانه‌كا خوه یا گه‌له‌ك مه‌زن بۆ پاشه‌رۆژا ئیرانێ هه‌بیت.
ئه‌و یه‌ك د ده‌مه‌كێ دایه كو نێزیكی مه‌هه‌كێ یه خوه‌نیشادان ل ئیرانێ و پڕانیا باژێرێن رۆژهه‌لاتێ كوردستانێ به‌رده‌وام دكه‌ن و هه‌تا نها ٢٤٠ كه‌س هاتینه كوشتن و هژماره‌ك زێده وه‌لاتی ژی بریندارن و ئیرانێ هێلا ئینتێرنێتێ بڕیه دا كه‌س نه‌زانیت كا چ روو دده‌ت، ب تایبه‌تی ژی ل باژێرێن رۆژهه‌لاتێ كوردستانێ توندوتیژی ل دژی خه‌لكی هاتیه بكارئینان و رێكخستنێن مافێن مرۆڤی یێن جیهانی ژی هۆشداریێ دده‌ن كو دڤێت رێگری ل ئیرانێ بهێته كرن.
ئه‌مریكا، وه‌لاتێن ئێكه‌تیا ئۆرۆپا، رێكخستنێن مافێن مرۆڤی و گه‌له‌ك وه‌لاتێن دی یێن جیهانێ ژی پشته‌ڤانیا خوه بۆ خوه‌نیشادانێن نها ل ئیرانێ دیار كرینه و ب تایبه‌تی ژی كه‌سایه‌تیێن ناڤدارێن جیهانی ژی پشته‌ڤانیێ ل خوه‌نیشادانێن نها ل ئیرانێ دكه‌ن و وه‌كو شورشا گه‌نجان بۆ بده‌ستڤه‌ئینانا ئازادیێ بناڤ دكه‌ن و داخواز ژ هه‌موو وه‌لاتێن جیهانێ ژی دكه‌ن كو پشته‌ڤانیێ ل شورشا گه‌نجان بۆ ئازادیێ بكه‌ن.
دوهی جاره‌كا دی كۆچكا سپی یا ئه‌مریكا راگه‌هاند كو ئه‌و ل هه‌مبه‌ر توندوتیژیا هێزێن ئێمناهیێ ل هه‌مبه‌ر خوه‌نیشاده‌ران بێده‌نگ نابن و دێ ب توندی به‌رپرسێن ئیرانێ سزا ده‌ن، سه‌رۆكێ ئه‌مریكا ژی دیار كر كو ئه‌و پشته‌ڤانیێ ل داخوازیێن خوه‌نیشاده‌ران دكه‌ت و دڤێت به‌رپرسێن ئیرانێ باش بزانن كو ئه‌و نه‌شێن خه‌لكی بێده‌نگ بكه‌ن، به‌رپرسێن ئیرانێ هزر دكرن دێ شێن دیسان خه‌لكی سه‌ركوت كه‌ن لێ مه‌هه‌ك ده‌رباز بوو و خوه‌نیشادان ل هه‌موو ده‌ڤه‌ران به‌لاڤ بووینه و ئه‌و یه‌ك ژی نیشا دده‌ت كو خه‌لك ل سه‌ر داخوازیێن خوه د رژدن.
