پەككەفتنا پەرلەمانی شاشییەكا دیرۆكییە و هەر ئالییەكێ ڕێگر بیت ل بەر چاڤێن خەلكی تاوانبارە
ئەندامەكێ دەستەیا كارگێڕییا جڤاتا بلندا خەباتكەرێن پارتی دیموكراتی كوردستان دیار كر، سەرەڕای ئاریشە و ناكۆكییان، چو دابڕان د ناڤبەرا پارتی دیموكراتی كوردستان و ئێكەتی نیشتمانی كوردستان دا ڕووی نەدایە. داخواز ژی ژ ئێكەتیێ كر پەرلەمانێ كوردستانێ بهێتە كارا كرن و ئاماژە كر كو پارتی بەرهەڤە هەتاكو كەسەكێ بێلایەن ژی ببیتە سەرۆكێ پەرلەمانی، بتنێ ژ پێخەمەت چارەسەركرنا ئاریشەیان.
عارف روشدی، ئەندامێ دەستەیا كارگێڕییا جڤاتا بلندا خەباتكەرێن پارتی دیموكراتی كوردستان بۆ ڕۆژنامەیا (ئەڤرۆ) گۆت: پەیوەندیێن د ناڤبەرا پارتی و ئێكەتیێ دا د ململانێ دانە، لێ ئەم نە دوژمنێن هەڤین و نێڕینێن مە یێن جودا هەنە، ئەڤە ژی تشتەكێ ئاساییە. پەككەفتنا پەرلەمانی بۆ دەمێ دو سالان و پێكنەئینانا كابینەیا نوو یا حوكمەتا هەرێما كوردستانێ، نیشانا ناكۆكییەكا كوورە.
عارف روشدی داخواز ژ ئێكەتیێ كر وەكو پارتی بیر ل نێزیكبوونێ بكەن و گۆت» پەرلەمانتاری بەرپرسیارەتییەكا مەزن یا نیشتمانی ل سەر ملی هەیە، چونكو خەلكی دەنگ دایێ و دڤێت ئەو پیرۆزییە ل بەر چاڤ بهێتە وەرگرتن. گرنگە وەكو ئیراقێ ل دەستپێكێ پەرلەمان بهێتە كاراكرن و ل دووماهیێ ل بن چەترا پەرلەمانی دا دانوستاندن ل سەر پێكهئینانا حوكمەتێ و بابەتێن دی بهێنە كرن، چونكو ئەڤ دەستهەلاتا یاسادانانێ شەرعییەتێ ددەتە هەرێما كوردستانێ».
دەربارەی وێ چەندێ ئایا پارتی بەرهەڤە بێ ڕێككەفتن ل سەر پۆستان پەرلەمانێ كوردستانێ كارا بكەت؟ عارف روشدی گۆت»بەلێ، بۆچی نە؟ هەكە مەبەست چارەسەركرنا ئاریشەیان بیت، پارتی بەرهەڤە و سروشتیییە كەسەكێ بێلایەن ببیتە سەرۆكێ پەرلەمانی. كارانەكرنا پەرلەمانی شاشیەكا دیرۆكییە و ئەو ئالیێ ڕێگریێ دكەت ل بەر چاڤێن خەلكی تاوانبارە».
ناڤبری ئەو گۆتنە ڕەتكرن یێن باس ل خوارنا مافێ ئێكەتیێ د حوكمەتێ دا دكەن و گۆت» ڕێگری ل چو وەزیرێن ئێكەتیێ یان گۆران نەهاتییە كرن كو كارێ خوە نەكەن، ئێكەتی پشكدارە د هەموو بڕیارێن دەركەفتین دا، لێ گەلەك جاران هندەك ئاخڤتنێن دوور ژ ڕاستیێ دهێنە بەلاڤكرن. بۆ نموونە، عیماد ئەحمەد، جێگرێ بەرێ یێ سەرۆكێ حوكمەتا هەرێما كوردستانێ ل سەر پشكا ئێكەتیێ بوو، د دەمێ خوە دا ب بەلگە بۆ سەركردایەتییا حزبا خوە ڕۆهنكرییە كو ئەو یێ ئاگەهدارێ هووركاریانە، لێ هەتا نوكە ژی ئێكەتی دبێژیت ئاگاهییا مە ژ دۆسێیا پەترۆلێ نینە».
ئەندامێ دەستەیا كارگێڕییا جڤاتا بلندا خەباتكەرێن پارتی دوپات كر كو پارتی بەرهەڤە هەر «سوبە» پەرلەمانی كارا بكەت و دەست ب دانوستاندنان بكەت و ئاماژەكر ژی كو پارتی گەلەك نەرمی دیاركرییە و مەبەستا مە خزمەتكرنا خەلكییە، نەك دێ پشكا مە چ بیت، لێ دڤێت ڕێز ل ئەنجامێن هەلبژارتنان ژی بهێتە گرتن».
