رۆسیا ئه‌فسه‌رێن به‌رێ یێن ئه‌فغانستانێ ره‌وانه‌ی ئۆكرانیایێ دكه‌ت
ئه‌ڤرۆ:
گه‌نه‌راله‌كێ به‌رێ یێ له‌شكرێ ئه‌فغانستانێ كو نه‌خواستیه ناڤێ وی بهێته ئاشكرا كرن بۆ ئاژانسا دویچه یا ئه‌لمانیا دیار كریه كو پشتی تالیبان ل ئه‌فغانستانێ هاته سه‌ر ده‌ستهه‌لاتێ پڕانیا ئه‌فسه‌ر و جه‌نه‌رالێن له‌شكرێ ئه‌فغانستانێ ره‌ڤین و ل هنده‌ك وه‌لاتێن ده‌وروبه‌رێن ئه‌فغانستانێ بجه بووینه و پشتی شه‌رێ رۆسیا و ئۆكرانیایێ ژ به‌ر كو گه‌له‌ك ئه‌فسه‌رێن رۆسیا د شه‌ری دا هاتینه كوشتن نها رۆسیا پێدڤی ب وان كه‌سانه یێن كو ئه‌زموونا شه‌ری یا هه‌ی و ژ به‌ر هندێ ژی گه‌له‌ك ژ ئه‌فسه‌ر و گه‌نه‌رالێن به‌رێ یێن له‌شكرێ ئه‌فغانستانێ دچنه دناڤ رێزێن له‌شكرێ رۆسیا دا و بۆ شه‌ری دچنه ئۆكرانیایێ.
هه‌مان گه‌نه‌رالی ئه‌و یه‌ك ژی دیار كریه كو رۆسیا مووچه‌كێ گه‌له‌ك باش دده‌ته وان كه‌سان و هه‌روه‌سا سۆزا هندێ ژی دایه وان هه‌كه د ئه‌ركێن خوه دا سه‌ركه‌فتی بن دێ بنه وه‌لاتیێن رۆسیا، ژ به‌ر هندێ ژی نها ب سه‌دان گه‌نه‌رال و ئه‌فسه‌رێن به‌رێ یێن له‌شكرێ ئه‌فغانستانێ بۆ شه‌ری چووینه ئۆكرانیایێ.
ده‌زگه‌هێن راگه‌هاندنا ئه‌مریكا ژی به‌ری چه‌ند رۆژان دیار كرن كو رۆسیا د شه‌رێ ل ئۆكرانیایێ دا هه‌تا نها ب هزاران ئه‌فسه‌رێن خوه ژ ده‌ست داینه و نها رۆسیا پێدڤی ب وان كه‌سانه یێن كو به‌ری نها د ناڤ له‌شكرێ ئه‌فغانستانێ دا جه گرتی، چونكی پڕانیا گه‌نه‌رال و ئه‌فسه‌رێن به‌رێ یێن له‌شكرێ ئه‌فغانستانێ ژ ئالیێ ئه‌مریكا ڤه راهێنان ب وان هاتیه كرن و كه‌سێن خوه‌دان ئه‌زموونن و بێگومان ئه‌و یه‌ك ژی بۆ رۆسیا ده‌لیڤه‌كا زێرینه، چونكی رۆسیا دشێت مفایه‌كا باش ژ ئه‌زموونا وان كه‌سان وه‌ربگریت.
