چاڤدێرێن سیاسی: گه‌فێن ئیرانێ بۆ هندێ نه دا قه‌یرانا ناڤخوه‌یی ڤه‌شێریت
ئه‌ڤرۆ:
رۆژنامه‌كا ئه‌مریكی راگه‌هاند كو ئیرانێ دڤێت ئێرشی سعوودیێ و هه‌رێما كوردستانێ بكه‌ت و چاڤدێرێن سیاسی ژی دیار دكه‌ن كو نها ئیران د قه‌یرانه‌كا گه‌له‌ك مه‌زن دایه و خوه‌نیشادان ژی به‌رفره‌هتر لێ دهێن و ئیرانێ دڤێت ب ئێرشێن وه‌سا رۆژه‌ڤێ بگوهۆریت دا قه‌یرانا ناڤخوه‌یی ڤه‌شێریت.
رۆژناما وول ستریت جۆرنال یا ئه‌مریكی راگه‌هاند كو ئیران به‌رهه‌ڤیان دكه‌ت دا ئێرشی سعوودیێ و هه‌رێما كوردستانێ بكه‌ت و سه‌باره‌ت ب هندێ ژی گه‌له‌ك زانیاری د ده‌ستێ وان دا هه‌نه و وه‌زاره‌تا ده‌رڤه یا ئه‌مریكا ژی هه‌ر زوو راگه‌هاند كو وان ده‌ست ب به‌رهه‌ڤیان كرینه و دێ ب توندی به‌رسڤا ئیرانێ ده‌ن. چاڤدێرێن سیاسی ژی دیار دكه‌ن كو نها خوه‌نیشادانێن ل دژی ده‌ستهه‌لاتێ رۆژ ب رۆژێ به‌فره‌هتر لێ دهێن و ده‌ستهه‌لاتێ هه‌تا نها نه‌شیایه كو خه‌لكی سه‌ركوت بكه‌ت و به‌رۆڤاژی پێشبینیا هنده‌ك ژ به‌رپرسێن ئیرانێ نها خوه‌نیشادان رۆژ ب رۆژێ به‌رفره‌هتر لێ دهێن و ل پڕانیا باژێرێن ئیرانێ خوه‌نیشادان ل دژی ده‌ستهه‌لاتێ برێڤه دچن و ده‌ستهه‌لاتا ئیرانێ نها گه‌له‌ك ته‌نگاڤ بوویه، گه‌فێن ئیرانێ ژی ژ به‌ر هندێ نه كو دخوازیت ب رێیا ئێرشكرنێ ل سه‌ر سعوودیێ و هه‌رێما كوردستانێ هه‌م قه‌یرانا ناڤخوه‌یی ڤه‌شێریت و هه‌م ژی رۆژه‌ڤا سیاسی بگوهۆریت دا وه‌لاتێن جیهانێ ئێدی به‌حسێ خوه‌نیشادانان نها ل ئیرانێ نه‌كه‌ن، لێ ئه‌و یه‌ك ب ساناهی نابیت چونكی ئه‌مریكا و هه‌ڤپه‌یمانێن وێ دێ ب توندی به‌رسڤا هه‌ر ئێرشه‌كا ئیرانێ ده‌ن.
ل گۆر باوه‌ریا چاڤدێرێن سیاسی نها ئیران د قه‌یرانه‌كا گه‌له‌ك مه‌زن دایه، چونكی ژ ئالیه‌كێ خوه‌نیشادان به‌رفره‌هتر لێ دهێن و ل ئالیێ دی ژی بارێ ئابووری یێ ئیرانێ گه‌له‌ك خراب بوویه، پشتی ده‌ستپێكرنا خوه‌نیشادانان هه‌تا نها بهایێ پارێ ئیرانێ ل هه‌مبه‌ر دۆلاری گه‌له‌ك هاتیه خوارێ و هه‌روه‌سا ژ به‌ر مانگرتنان ژی زیانێن گه‌له‌ك مه‌زن گه‌هشتینه ئابووریا ئیرانێ، ئه‌و یه‌ك ژی بوویه ئه‌گه‌ر كو تووره‌بوونا خه‌لكی ل هه‌مبه‌ر ده‌ستهه‌لاتێ زێده‌تر لێ بهێت، ژ به‌ر هندێ ژی نها به‌رپرسێن ئیرانێ وه‌سا هزر دكه‌ن هه‌كه بشێن شه‌ره‌كێ ل ده‌رڤه‌ی سنۆرێ خوه دروست بكه‌ن دێ شێن وه‌سا رۆژه‌ڤا سیاسی یا خه‌لكی بگوهۆرن و دێ جاره‌كا دی بێژن كو مه‌ترسی ل سه‌ر ئیرانێ هه‌یه دا خه‌لك نه‌چار بن كو خوه‌نیشادانان ب دووماهی بینن، لێ ڤێجارێ گه‌له‌ك تشت بۆ خه‌لكی ئاشكرا بووینه و هه‌ر ئێرشه‌كا ئیرانێ ل سه‌ر سعوودیێ و هه‌رێما كوردستانێ دێ ئه‌نجامێن خوه یێن گه‌له‌ك خراب بۆ وی وه‌لاتی هه‌بیت.
ئه‌و یه‌ك د ده‌مه‌كێ دایه كو به‌ری دو رۆژان حسێن سه‌لامی فه‌رماندارێ سوپایێ پاسدارێن ئیرانێ راگه‌هاند كو ئه‌مریكا، سعوودیێ و ئسرائیل ئه‌گه‌رێن سه‌ره‌كی یێن خوه‌نیشادانێن نها یێن ئیرانێ نه، ئه‌و وه‌سا دكه‌ن كو خه‌لك خوه‌نیشادانان بكه‌ن وان دڤێت ره‌وشا ناڤخوه‌یی یا ئیرانێ ئالۆز بكه‌ن، لێ دڤێت هه‌ر كه‌سه‌ك باش بزانیت كو یێن بخوازن ئالۆزیان ل ئیرانێ دروست بكه‌ن ئیران ژی دێ ره‌وشا وان یا ناڤخوه‌یی ئالۆز كه‌ت.
ده‌زگه‌هێن راگه‌هاندنا ئیرانێ ژی دیار دكه‌ن كو گه‌نجێن نها گۆهداریا ده‌ستهه‌لاتێ ناكه‌ن و ل هه‌مبه‌ر ده‌ستهه‌لاتا نها گه‌له‌ك تووره نه، چونكی ئه‌و تشتێن گه‌نجێن نها دخوازن ل ئیرانێ نینه، گه‌نج داخوازا ئازادیێ و ژیانه‌كا مۆدێرن دكه‌ن لێ ده‌ستهه‌لات ژی ئاسته‌نگیان دروست دكه‌ت و هه‌كه پێداچوونه‌ك د هه‌لوه‌ستێ ده‌ستهه‌لاتێ ل هه‌مبه‌ر داخوازیێن خه‌لكی دا نه‌هێته كرن دێ ئالۆزیێن هه‌ی دژوارتر لێ هێن و ئه‌و یه‌ك د به‌رژه‌وه‌ندیا چو ئالیه‌كێ دا نینه.
دو رۆژان به‌ری نها سه‌رۆكێ پارتا كۆماریا ئیسلامی یا ئیرانێ ژی راگه‌هاند كو دڤێت ده‌وله‌ت ده‌ست ب گوهۆرینێن بنگه‌هین بكه‌ت و دڤێت ب رێیا ریفراندۆمه‌كێ گه‌له‌ك تشت ل ئیرانێ بهێنه گوهۆرین، هه‌كه ئه‌و یه‌ك نه‌هێته كرن دێ كاره‌ساتێن گه‌له‌ك مه‌زن روو ده‌ن و ژیانا به‌رپرسێن نها یا پاراستی نابیت چونكی خه‌لك ژ به‌رپرسێن نها گه‌له‌ك تووره نه و كوشتنا وه‌لاتیان ژ ئالیێ هێزێن ئێمناهیێ ڤه ژی وه‌سا كریه كو باوه‌ریا خه‌لكی ب ده‌ستهه‌لاتێ نه‌مایه.
